Text Box: Bismillah-ir-Rahman-ir-Rahim KHUTBA JUMMAH HAZRAT AMIR’UL MOMENEEN MUHYI-UD-DIN AL KHALIFATULLAH MUNIR AHMAD AZIM 30 Janvier 2009 (Résumé du Khutba Jummah) Après ki le Khalifatullah fine saluer zot tous, li fine commence lire le Tashahhud, Taouz et Surah Al Fatiha et ensuite li fine dire: Aujourd’hui mo pou cause impé lor l’abolition de l’esclavage qui commémoré tous les 1er février et qui ene congé public, surtout à Maurice. Bane politiciens et bane dimounes cause l’abolition de l’esclavage. L’esclavage fine existé dans tous bane peuples bien avant l’avènement de l’islam en Arabie. Au moment kan le Saint Prophète (s.a.w) fine révendique li comme Messager d’Allah, aucaine la loi dans lémonde pas ti encore prévoir couma pour diminié bane duretés de ça tragédie là. Si l’islam pas ti interdit li officiellement dès le commencement c’est parce qui li pas capave pas prend en considération bane réalités objectifs d’ene Arabie primitif. L’islam ti envie établir ene la loi ki pas pou détruire ou déséquilibrer brutalement bane institutions ki ti déjà exister dans la société arabe. Anou supposé ki le Saint Prophète Mohammad (s.a.w) ti dire : « A partir zordi, pas pou ena esclaves ! » ; alors ki ti pou arriver en supposant ki bane barbares de son l’époque ti vraimême écoute li et libère tous bane esclaves ? Beaucoup de bane dimounes ki fine sorti bien loin de zot pays d’origine ti pou trouve zot dans la rue et aussi bane commerces de côté l’agriculture ou de côté artisanales ti pou faire faillite, à cause péna dimounes pou travail. Aussi, étant donné ki bane musulmans ti à ça l’époque là perdi parmi bane la foule de bane infidèles, alors ça bane esclaves là ti pou toute de suite capturé par bane marchands esclaves, ki ti pou ensuite revende zot à bane lézot dimounes. Ça bane marchands esclaves là ti pou saute lor ça bane esclaves là ki ti pou sans Maître et sans ene place pou zot rester. Alors, au lieu pou remplace ene mauvais ki donne nous beaucoup douleur, par ene mauvais ki si mette li en pratique, ti pou cause plisse dimal à ça bane esclaves là, alors li ene meilleur moyen pou réduire ça problème là petit à petit. Dans ça façon là doucement doucement ça problème là pou régler par li-même sans provoke ene problème grave ki ti pou capave créer bane les autres problèmes dans bane les autres secteurs de la société ki pli important. Toutefois, l’islam pas fine attane bane progrès de l’industrialisation pou fixer bane la lois ki pou assure ene traitement humain à bane esclaves et pour déclenche ene processus ki pou amène vers la libération assuré de ça bane esclaves là ; ene telle libération ki zamais encore zot pas pou révine esclaves encore. Le prophète Mohammad (s.a.w) fine conseille bane croyants : « Et zot esclaves, nourri zot avec même nourriture ki zot-même zot manger, et habille zot avec même sorte vêtement ki zot-même zot metter, et si zot commette ene faute ki ou pas capave pardonner, alors laisse zot aller parceki zot bane serviteurs d’Allah et de ce fait, ou pas bizin traite zot brutalement. » Quran Shareef, de so côté, mette beaucoup l’emphase lors libération de bane esclaves.  « C’est quoi l’élévation spirituelle ? », Quran fine demandé et li-même li fine donne nous la réponse :  « Fakku raqabah » -  c’est libère ene esclave. Ch. 90 V. 14. Le Saint Prophète (s.a.w) de l’islam jamais fine arrête recommande la douceur même envers bane zanimaux et li fine même interdit pou humilier bane serviteurs par appelle zot par le mot « boy » ou « servante » ou « esclave » etc. Et dans ene l’autre Hadith le prophète (s.a.w) fine déclaré : « Nannié pas plaire autant à Allah ki action pour libère ene esclave. » (Bukhari) Dans l’État Islamique, bane esclaves zamais fine considérés couma bane marchandises. Mais c’est pas le cas pour Rome (en Italie), kot bane esclaves pas ti ena zot dignité ! L’islam fine redonne à bane esclaves zot dignité et fine proclamé ki « Celui qui touille so esclave, nous pou touille li (en retour), celui qui mutile néné ça esclave là, nous pou mutile en retour so néné et celui qui retire définitivement ene esclave so organe reproducteur, nous pou retire séki pou li aussi. » (Bukhari et Muslim). « Celui qui corrige excessivement so esclave, ou ki donne li ene calotte, le prophète (s.a.w) fine dire, alors ki li répare so faute par libère esclave là. » Non seulement bane esclaves ti pé jouir d’ene statut ki pareil à zot bane maîtres, mais aussi zot libération éventuelle ti assurée par deux situations (la lois) ki fine établir par l’islam : 1er c’est libération volontaire ki maître là accorde esclave là kot li regagne so liberté et 2ème c’est libération ki esclave là gagner par so maître kan li écrire maître là ene lettre officielle pour demande so libération (Mukatabah). Azordi jours ena séki nous appelle l’esclavage moderne, kot ena bane immigrants clandestins. Ena à peu près 170 millions de dimounes ki émigré ou immigré dans le monde dans ene façon légal. Sans doute ena 20 ou 30 millions de bane les autre dimounes ki migré illégalement, kot 4 millions zis dans l’Europe. Ena ene la vente et l’exploitation de bane dimounes ki estimé à quelques 15 milliards de dollars par an, ki organisé par bane dimounes bien profféssionel dans zot domaines et aussi par bane criminels. Derrière ça bane chiffres là, ena tragédie de ça bane clandestins là ki fine soit noyés ou soit même asphyxiés dans bane camions ; ena aussi drame de ça bane travailleurs de Philippines ki fine gagne batté dans Malaisie et ena même la force de ça bane expulsés d’Afrique du sud qui fine réussi sauver dépi train… Eski ça fine vine ene profession ? Surement ene profession de foi dans ene l’avenir meilleur encore. Esclavage moderne : bane zenfants ki pé travail. Ça c’est ene la honte ki dans quatre états Américains, 800,000 zenfants Mexicains kot parmi là-dans ena moins ki 10 ans qui travaillent dans secteur agricole. Dans Central Valley dans Californie, tous les matins ça bane zenfants là commence la journée dépi dix heures au milieu de bane vignes ki arrosé avec bane gouttes la pluie du matin ; avec soleil, la terre réchauffer et ça bane gouttes d’eau là évoporer, et ça remplacer par bane nuages la poussière. Dépi 7 heures dimatin zot lizié pou commence larmer, irriter par bane pesticides ki ena soufre là-dans ki infiltrés dans la terre. Au fur et à mesure que ça soufre là pou pénétrer dans zot poumons, zot pou senti zot gagne bane vertiges terrible. Même pour ene adulte, ça ti pou ene traitement bien cruel et inhumain. Ça bane zenfants parmi bane 800,000 zenfants qui travaillent dans bane exploitations agricoles dans États-Unis, plisse ki la moitié ena moins ki 15 ans. En Californie, dans l’Arizona, dans l’état de Washington et dans Texas, bane enfants moins ki 10 ans ou jusqu'à même 12 ans zot employés comme main d’œuvre bien bon marché dans secteur agricole, et ça secteurs là vaut beaucoup l’argent et ça bane zenfants là travaillent dans l’illégalité. Zot bane immigrants clandestins, ki vine d’Oaxaca, dans Mexique. Mais à 12 ans, ene zenfant capave travaille en toute légalité dans ene exploitation (kot zot bizin travail bien dure), tandis ki dans tous les autres secteurs, li bizin attane l’âge de 14 ans pour ki li capave travaille quique part. Ene Indien dans l’Inde raconte nous impé séki pé passé dans l’Inde. Ala séki li dire : « Mo la guerre pour bane dalits dépi ki mo fine témoigne bane atrocités et bane discrimination dans mo village kan mo ti zenfant… » Li même li ene dalit, donc « intouchable » parski bane dalits zot considéré comme bane impur par bane les autres castes, qui oblige bane dalits pour boire dans bane verres différent, pour retire zot souliers dans certain la rue, ou bien pou marier dans zot propres castes, parski si zot marier dans bane les autres castes zot risquer passe par bane persecutions terrible dans la main de bane les autres castes. Ene l’example de ça, bane là capave brule zot village ou commettre bane crimes ou bane viols envers caste dalits. Bane dalits zot représente pas moins ki 17% de la population indien, soit environ 170 millions dimounes qui continuer pou être bane victimes d’ene « apartheid ki masqué ». Alors zot joindre catégorie de bane minorités non-hindoues, notamment bane musulmans, ki victimes de bane discriminations et ségrégations (kot zot vivre séparer avec bane les autres kalité dimounes). L’inde li le seul pays au monde kot bane formes de ça bane discriminations là zot aussi extrêmes (tout comme à Maurice, aujourd’hui bane différents parties politiques zot pé cause lor l’abolition de l’esclavage ; li totalement fausse) ! En effet, bane dalits zot subir bane boycott et bane humiliations tous les jours. De ce fait, le fait ki zot fine tombe dans bane situations ki ressembler l’esclavage, zot obliger faire bane tel travails dégradants couma balyé la rue, ramasse saleté, travail avec la peau zanimeaux etc. En tant ki travailleurs agricoles, l’entrée de bane la cazes, l’utilisation de bane propriétés publics (la rues, puits, l’écoles…), l’accès à de l’eau, à l’électricité zot interdits pour zot, tandis qui l’accès à bane ressources naturelles, ki tout village bizin servi, bizin negocié ça chaque fois ki zot bizin servi li. Bane sél travails ki capave donne zot dans nous société azordi jour, surtout dans bane la villes, c’est donne zot pou balyé la rue. Bane femmes dalits kan à zot, zot bien souvent victimes de bane harcèlement et bane abus sexuels. » Tout ça bane atrocités là, ça jeune indien de l’Inde fine faire le monde conné séki pé passer vraiment parmi bane castes dans l’Inde ; à propos de zot misères, de zot persécutions etc. De ce fait, c’est l’abolition de ça système de caste ki bane dalits souhaiter. Zot ti fine profite d’ene conférence mondiale lor le racisme pour faire zot la voix tender. Mais malheureusement, la plupart de bane indiens zot préfère reste tranquille lor ça sujet là, parski séki posséder, li préfère profite de ça système ki bénéficier zot là. BANE DROITS DE L’HOMME DANS QURAN L’objectif de l’islam li avant tout pour libère l’homme et pour élève li à ene position de dignité et d’honneur ki li ena tout à fait droit en tant ki humain. Dans Quran Ch. 17 V.71 :  « Nous fine donne l’honneur à bane zenfants Adam, et nous fine transporte zot lor la terre et la mer. Nous fine fourni zot bane bons kitchoses, et Nous fine accorde zot plisse de faveurs ki à beaucoup Nous les autres zenfants. » Ainsi, premier kitchose ki nous bizin prend en considération kan aborde ça sujet de bane droits de l’homme en islam, c’est ki ça bane droits là, c’est Allah ki fine Li-même donne nous, et c’est pas ene léroi, ni ene gouvernement, ni premier Ministre, ni bane discussions d’ene quelconque institution humain ki fine accorde nous ça. De ce fait, aucaine dimoune ou aucaine autorité pas capave change et pas capave retire ça bane droits là, à aucaine moment. Ene l’autre kitchose important ki bizin mentionner, c’est ki ça bane droits là prend en considération zis le bien-être de l’homme ; aucaine dimoune, ki so religion, nationalité ou race capave été, pas capave être privé de ça bane droits là parski li appartenir à la famille de bane humains. Droit pour protège ene dimoune so la vie, d’après Quran, la vie de l’homme li bien sacré – nous capave trouve dans ça bane versets là, couma pé mentionne couma la vie de l’homme li sacré, et donc pas capave touille ene dimoune, excepté pour ene cause valable. Ch.17 V. 34 & Ch.5 V.33 :  « Pas tire la vie ki Allah fine rende sacré, excepté par la justice. Pou celui ki gagne touyé injustement, Nous fine donne so héritier l’autorité (pou demande dommage). Mais faudrait pas ki li exagérer, kan ena ene meurtre, parski li pou gagne aide. » (Ch.17 V. 34)  « A cause de ça, Nous fine prescrire pou peuple Israel ki, si ene dimoune touye ene l’autre, sans ki ena ene premier crime pou venger, ou ene malfaiteur lor la terre pou puni, li pou pareil couma dire li fine touye toute la communauté. Et si li sauve ene la vie, c’est comme si li fine sauve toute la communauté. Nous bane Prophètes fine vine parmi zot avec des signes clairs, mais la plupart parmi zot, même après ça, continuer commette l’extravagance lor la terre. » (Ch.5 V.33) Le droit pour la justice : le premier et principal devoir du prophète (s.a.w) ti pour établir la justice et ça bizin continué être le devoir de chaque dimoune pour faire la justice. Li pas zis le devoir pour bane autorités publiques pour faire la justice régner partout, mais chaque dimoune ena le droit pour lutter contre l’injustice. Concernant ça, nous capave cite plusieurs versets, mais mo pou cite seulement ça verset là, pour faire zot bien comprend :  « O ou ki ena la foi ! Tini ferme avec Allah, et témoigne toujours la vérité. Pas laisse la haine pou dimoune affecter ou et empêche ou faire la justice. Bizin faire la justice.. ça rapproche avec chemin Allah. Suivre l’ordre Allah, parski Allah au courant de séki ou faire. » (Ch.5 V.9) Le droit à l’égalité, entre deux dimounes ; Quran reconnaite zis ene sél critère de supériorité : la piété ; c-à-d, séki différencier bane dimounes c’est zot niveau de piété. Faudé pas nous faire aucaine distinction entre degré de parenté, bane relations entre tribus et sectes, entre la couleur de la peau et pays ki nous rester. Ça verset ki mo pou cité là li ene grand témoin de ça : Ch. 3 V.196, Ch. 46 V.20, Ch. 49 V.14 :  « Zot Maître fine accepter zot la prière et fine dire : « Mo pas pou laisse ou travail perdi, soit ki ou ene z’homme ou ene femme, ki faire du bien, parski zot tous alliés ene à l’autre. Alors bane ki fine émigrer et fine gagne pousser de zot la caze, ki fine gagne tracas pour Mo cause, ki fine faire la guerre, et ki fine mort touyé, Mo pou repousse le mal de zot, et Mo pou faire zot rentre dans jardin avec bane la rivières ki couler là-dans. C’est ene récompense de Allah. Et Allah, c’est avec Li ki ena meilleur récompense. » (Ch.3 V.196)  « Ena des grades pou sakaine, d’après séki li fine faire. (Allah) pou récompense zot pleinement pou zot actions et pas pou faire zot aucaine injustice. » (Ch.46 V.20)  « Ô dimounes ! Nous fine créés ou d'ene mâle et d'ene femelle, et Nous fine faire de ou des nations et des tribus, afin ki ou faire connaissance entre ou ; et le plus noble parmi ou dans lizié d’Allah, c’est celui ki suivre plus près So chemin droite. Allah conne tout et Li bien informé. » (Ch.49 V.14) D’après Shariah, ene dimoune li bizin obéir séki légal aux yeux d’Allah et li bizin dissocier li avec séki illégale ; li bizin même désobéir pour faire kitchose illégale et corrige ça mal là autant ki li dans so pouvoir pour faire li. (Lire Ch.5 V.3) :  « Ô ou ki ena la foi! Pas laisse viole sainteté bane l’endroits sacré pou Allah, ni le mois sacré. Laisse tranquille bane z’animeaux pou sacrifices, zot guirlandes, et bane dimounes ki vine visite la maison sacrée, pou cherche faveur et satisfaction zot Maître. Kan ou fine libère (kan ou fine tire ou Ihraam) alors ou capave faire la chasse. Pas laisse la haine dimounes ki ti repousse ou dépi dans Masjid Sacrée affecter ou ziska séki ou arrive abuser contre zot. Aide l’un à l’autre faire du bien et pou emmène ene bon la vie. Pas aide l’un à l’autre pou faire péchés et pou créer l’ennemité. Craindre Allah parski Allah dure en punition. » Droit à la liberté, Quran déclare d’ene façon ki nous capave comprend, ki aucaine dimoune ki ena l’autorité, ni même ene prophète, péna le droit pour faire ene dimoune vine ene esclave. Allah dire :  « Ene dimoune à ki Allah fine donne So livre, la Sagesse et le rang de Prophète, c’est pas possible ki li dire dimounes, après ça : « Adore-moi pluto ki Allah ». mais au contraire li pou dire : « Vine bane vrai serviteurs (esclaves) d’Allah, parski ou enseigne So livre et ou étudier li.  (Ch.3 V.80) Toutefois nous bizin bien comprend clairement, ki le mot esclave dans ça contexte de ça verset là li utilisé non pas dans le sens technique de l’esclavage mais dans le sens général d’être entièrement dépendant de bane les autres êtres humains. Droit à la liberté de conviction (l’opinion, l’idée, croyance) ; d’après Quran, l’homme gagne dans ene façon bien équitable bane l’honneurs spirituels quand li choisir par so propre volonté pour suivre le droit chemin. Nous pas capave force aucaine dimoune pour suivre le droit chemin. Allah dire dans Quran Ch. 2 V. 257 et Ch.10 V.109 :  « Pas bizin force personne dans la religion ! Bon chemin fine fini rende claire, en comparaison avec l’erreur. Celui alors ki rejette idoles, et gagne la foi en Allah, li tenir couma dire ene la manche bien solide, ki pas pou craquer. Allah écoute et conne tout. (Ch.2 V.257)  « Dire : "Ô dimounes ! La vérité fine vine devant ou dépi kot ou maître. Celui ki suivre bon chemin, li faire ça pou bénéficier so propre l’âme. Mais celui ki égarer, so égarement alle contre son âme. Moi (le prophète), mo pas là pou surveille ou. » (Ch.10 V.109) Droit à la liberté d’expression ; bane croyants zot sous l’obligation pour dire la vérité sans crainte. Bane commandements suivants faire nous comprend ça bien :  « Ô bane croyants! Tini ferme pou la justice comme témoin Allah, même si ou ena pou témoigner contre ou-même, ou papa, maman, ou bien ou proche parents. Ki kikaine riche ou pauvre, c’est Allah ki pou protège tous les deux. Alors pas suivre ou propre désir, si ou oulé faire la justice. Mais si ou change (ou témoignage), ou bien ou tourne lédos avec la justice… Allah au courant de séki ou faire. (Ch.4 V.136) Droit pour la protection de l’honneur ; d’après Quran, protection de réputation et l’honneur de bane dimounes arrive en priorité, dans l’échelle de bane valeurs sociales et nous bizin préserve li. Allah mette nous sérieusement en garde contre palabres, la médisance, bane fausses allégations, et bane rumeurs. Allah dire :  « Dimoune ki lance accusations contre bane bon madames musulmans ki simplement distrait, zot pou gagne malédiction dans ça la vie là comme dans l’autre, et zot pou gagne ene gros punition. (Ch. 24 V.24)  « Ô bane croyants! Pas laisse ene groupe moque d’ene l’autre. C’est possible ki sanlà meilleur ki premier groupe là ; et pas laisse bane femmes moque d’autres femmes. C’est possible ki second groupe là meilleur ki premier groupe là. Pas diffamer entre ou, et pas lance l’un à l’autre bane sobriquets. Couma mauvais ene nom vicieux à kikaine ki déjà ena la foi ! Bane ki pas répenti, zot bane vrais malfaiteurs. »  Ô bane croyants! Évite faire beaucoup suppositions ; certain suppositions, péché. Pas espionner, et pas cause derrière lédos ou camarade. Eski kikaine parmi ou content mange la viande so frère mort ? Ou trouve ça horrible. Alors craindre Allah, car Allah accepter répentir dimoune et pardonne zot. » (Ch.49 V.12 & 13) Nous prier Allah pour ki tous bane humains, de tous bane religions zot capave conne la grandeur du Quran, parski c’est bien Allah Le Très-Haut et So prophète (s.a.w) qui fine enseigné nous bane droits de l’homme dans le Quran, et c’est grâce à la religion de l’islam ki l’esclavage fine disparaite. Péna personne d’autre qui derrière ene tel exploit. Bane les autres dimounes prend zot comme bane héros de l’abolition de l’esclavage, mais zot pé faire erreur pour croire ça, et surtout kan zot faire bane tel déclaration dans zot bane discours. Malgré le fait ki zot cause à propos de ça, mais bane dimoune pé toujours êtres persécutés dans plusieurs aspects ; et ça c’est ene l’esclavage pure et simple ! Mo pé adresse moi à tous bane dirigeants de tous bane communautés en entier et aussi à bane chefs d’état, étudié bane paroles de Dieu dans le Coran pour élimine complètement l’esclavage dans tous so bane aspects. Incha-Allah, ki Allah guide nous vers la réussite d’ene telle volonté ! Amîn.