Text Box: Bismillah-ir-Rahman-ir-Rahim KHUTBA JUMMAH HAZRAT AMIR’UL MOMENEEN MUHYI-UD-DIN AL KHALIFATULLAH MUNIR AHMAD AZIM 31 Octobre 2008 (Résumé du Khutba Jummah de plus de 1½ hrs) Après ki le Khalifatullah fine saluer zot tous, li fine commence lire le Tashahhud, Taouz et Surah Al Fatiha et ensuite li fine lire ça bane versets suivants là, ki ene continuation de Khutba Jummah lor: TAWBAH (REPENTIR)  Wallazina amilus sayyiaati summa taabuu mim badihaa; wa aamanuu inna Rabbaka mim badihaa la Gafuurur Rahiim. Tandis ki bane ki faire des mauvais actions, mais après ça zot repentir et gagne la foi – eh bien, to Maître après ça Li pardonne zot et Li accorde zot So grâce. (Ch.7 Al-Arraf V.154)  Alam ya-lamuun annallaaha huwa yaqbalut tawbata an ibaadihii wa’annallaaha huwat-tawwaabur Rahiim. Est-ce qui zot pas conner ki c’est Allah seul ki capave accepter repentir so bane serviteurs et ki recevoir bane sadaqa, et ki c’est Allah ki accorde nous So pardon et So grâce ? (Ch.9 At-Taubah V.105)  Fiihi rijaaluuyy yuhibbuuna ayy-yatatah’haruu. Wallaahu yuhibbul muttahhiriin. Là-dans ena dimoune ki cherche purifier zot, et Allah content bane dimoune ki purifier zot. (Ch.9 At-Taubah V.108)  Innallaaha huwat Tawwaabur Rahim. C’est Allah ki pardonne toujours et ki gracier. (Ch.9 At-Taubah V.119) QUI PÉCHÉS KI BIZIN REPENTIR ? Péchés là grands ou petits, mais c’est péchés ! Lor bane nombre de grands péchés, bane docteurs en théologie ena différent l’opinion. Ena ki dire ena « trois », l’autre dire « quatre ». ena ki énumérer, zot dire ena onze grands péchés. Kan Ibn Abbas ti tendre Ibné Omar estimer bane nombre grands péchés, c’est « sept » ; alors Ibné Abbas ti contredire ki le nombre ti environ 77 et ti dire tout seki Allah fine interdit, bizin considère comme ene grand péché. Ena certain ki déclarer ki bane grands péché pas capave bien déterminer. Alors d’après saki nous comprend d’après Quran et hadith, l’homme bizin évite tout péché petit ou grand. Selon certain saints, bane pieux, tout péché ki comporte ene punition judiciaire dans ça lemonde là, bizin être considérer comme grand péchés. En récapitulant les grands péchés, ena bane savants théologiens zot dire ki li représenter par 17 fautes. Parmi ça bane péchés là 4 concernant le cœur : 1. Nous associer quelqu’un avec Allah. 2. Persister dans l’égarement et la transgression de la loi divine. 3. Désespérer lor pardon et la bonté d’Allah. 4. Nous croire ki Allah pas pou attrape bane ki pé faire mauvais dans ça le monde là. Quatre ki commette par la langue : 1. Porte ene fausse témoignage. 2. Faire accusation lor ene dimoune pieux ki li fine commette adultère. 3. Faire ene fausse serment pour donne avantage ça ki ena tort et faire ene moyen pour cokain du bien ki appartenir les autres, même si ça dibien là représente ene brosse à dent ki fine faire avec ene branche d’arbre. 4. Faire de la magie (sorcellerie). 3 Grands péchés dans ventre : 1. Boire du vin, ou n’importe ki boisson spiritueuse, ki faire perdi raison. 2. Dépense du bien ene orphelin. 3. Prend l’intérêt. 2 grands péchés : l’adultère et la sodomie. 2 l’autre grands péchés avec ou la main : Faire crime et vol (cokain). 1 péché avec lipié c’est alle la guerre ; ene l’autre grand péché cote concerne le corps en entier : cote pé désobéir parents. Si ou parents fine défendre ou pour faire quelque chose ki pas bon, ou désobéir li, ou maltraite li, ou réprimande li et si li demande ou quelque chose, ou refuse li et si ou pas traite li bien (ou pou bizin réponde pou tous ça là). Bane tipti péchés li pas numérables. Ena dire ki tipti péchés pas capave comptés. Mais li pas encadré, parceki tipti, tipti péché, couma dire li pé caryate bane bon bon action et faire nous perdi la lumière de la conscience et la lumière divine. Le but ki propose la loi divine kot li faire ou évite faire tout bane faute et erreur et ou gagne ene conscience propre jusqu’à ou vine pli près avec ou Créateur. Quran fine ordonne nous abandonne nous l’extérieur et nous l’intérieur avec péché. Bon ! Nous bizin faire ene devoir pour abandonne nous côté extérieur et coté intérieur avec péché. Kan juge ene quelqu’un avec l’injustice ou maltraite li, calomnier li, cause menti, bane les autres fautes semblables, nous compte ça parmi bane tipti péchés. Couma quelqu’un ki commette ene grand péché et li donne ça ene l’importance ki li bizin faire Tawbah vite, comme ça même bane tipti tipti péchés ki nous commette et nous pas donne li ene l’importance, ça bane tipti tipti péché là aussi li vine grand sans ki ou réaliser. Allah dire dans Quran : Si ou évite bane grand péchés ki fine défendre, Nous (Allah) pou couvrir bane les autres offenses et Nous pour faire ou rentre par ene l’entrée noble (paradis). Non seulement nous bizin évite bane grand péchés mais évite tous bane péchés en générale en faisant le Tawbah. Grand ou petit péchés, kot li faire ene démarche pour éloigner, ça c’est la piété kot li incline ou pour marche dans le droit chemin. Eski ene dimoune ki pé marche dans ene chemin rempli de piquants li penser so lipié pas pou piquer ? Pas considère ene ti péché ene kitchose normal, parce ki kan ou guette ene montagne devant ou c’est fine commence par bane ti graviers (ti roches). Anas Ibn Malik dire ki ene jour le Prophete (s.a.w) et certain de so bane compagnons fine rentre dans ene vallée. Hazrat Miuhammad (s.a.w) fine ordonne zot pou ramasse ene certaine kantité dibois mais zot pas pé trouver aucaine place mais zot pas conné couma pour obéir ça l’ordre du Prophète (s.a.w) là. Alors le Prophète (s.a.w) fine conseille zot même bane branches de bane z’arbres. Alors zot fine faire zot mieux pour gagne la kantité. Le prophète fine prend ça comme l’exemple et fine dire zot : « De la même façon ene nous bane fautes ajoute avec ene l’autre fautes li vine ene grand péché. Ene mauvais action ki ou faire li reste toujours ene mauvais action. Et comme ça même ene bon action ki ene dimoune faire, pour li pas perdi ça vertu là li pour faire ene l’autre bon action. » Certains dire ki kan nous considère ene péché tipti, mais divant Allah ça péché là compte bien grand. Par contre si ene croyant sincère faire ene tipti faute et li juge ça ki ça pas tipti li grande, li prend ene tracas et repentir, Allah efface ça et faire ça disparaître comme si pas ti exister. Ene croyant la foi ki li fine place lors so Rab et bane excellent qualité et bane connaissance ki Allah fine donne li dans la spiritualité moin ene ti faute minime ki li commette, ça fatigue li et donne li ene grand tracas. Attention so Rab pas fine satisfait saki li fine faire, so conscience reproche li et li tourne vers Allah en repentance. Hazrat Muhammad (s.a.w) fine dire ki ene croyant le moindre péché ki li fine commette li trouve ça couma ene montagne ; mais ene hypocrite trouve so péché couma ene mouche posée lor so néné, et li flatte li-même et li trouve ça ene plaisir pour dire ki li fine commette tel ou tel péché ! Ena certains bane péchés ki Allah pas pardonner facilement, bane péché ki Allah fine mette pardah lor là et zot pé dévoiler, parce ki ena ene faiblesse dans zot la foi et zot manque certain confiance lor la grandeur d’Allah. D’après zot analyse, péché là pas grave et li insignifiant. Allah de par So Sagesse et So pitié pour So bane serviteurs Choisi ki Li ena, kot zot bizin prend compte zot modestie et zot dignité comme ene faveur et cadeau de côté d’Allah, kot ça capave éloigne zot tous (bane Choisi d’Allah et bane les autres dimounes) avec bane faiblesses, pour garde zot dignité et ene morale bien haute. Ça c’est le vrai cadeau ki Allah donne nous tous, mais malheureusement, nous pas conne ça valeur et cadeau précieux ki Allah fine donne nous là et kan nous commette ene péché kot Allah seul conné et Allah Li même fine mette ene Pardah lors là. Alors nous alle dévoile nous propre faiblesse partout, couma dire ene grand zaffaire ki nous fine faire. Alors ça kalité actions là Allah pas pardonner. Ou bizin toujours rappeler ki ena ene toute-puissance ki pour juge ou et pou demande ou bane compte et nous conné tous ça ki fine défendre par Allah zot considérer comme ene grand péché par Allah li-même. Certains compagnons du prophète (s.a.w) fine reproche bane Tabiin pour zot bane façons de faire ; exemple : Soupçonner et même espionner comme bane zaffaire bien graves et le prophète (s.a.w) li-même fine considère ça ki ça bien grave aux yeux d’Allah, mais nous pas réalise ça du tout. Tout ça bane détails là faire nous apprendre ki nous bizin repentir et ça ene devoir obligatoire chacaine parmi nous. Et personne pas capave dire ki li pas pé commette péchés, même si li pas par bane action ou par bane membres de so lécorps, mais li capave pé commettre li par so lécoeur et si so lécoeur li pur, satan trouve ene moyen pour faire ça dimoune occupé dans bane les autres zaffaires mondaines, pour oublier so Rab, li tellement occupé ki li pas gagne l’occasion pense lors Allah et So bane attributs et aussi li capave oublier pour remercier Allah pour So bane faveurs ki fine faire lors li et li pas ena ene reconnaissance pour so Rab et dans ça façon là li fine commette ene péché kot li donne ene l’autre plisse l’importance ki Allah. Tous ça là li déterminer ki dégré connaissance ene croyant li capave arrive au point de vue spirituel. A chaque degré existe bane mérites et bane démérites. Bane limites et bane prescriptions. Nous bizin admettre avec respect et déférence, kot fine faire le péché, bizin repentir. Repentir avec beaucoup de sincérité, li écarte nous avec le chemin de l’enfer, et en même temps suivre ene chemin droite et purifier nous, faire nous vine propre (pieux). Tous bane croyants zot trouve ça nécessité de repentir là, mais zot repentance li différent avec bane dimoune ki vulgaire, malhonnête et cause menti beaucoup, ça bane là zot tellement fine faire bane péchés ki zot fine oublier Allah complètement. Parce ki si zot ti penser ki ene jour zot ena pour joindre zot Allah et bizin rendre compte, zot ti pour essaye faire bane zeffort pour pas faire ça bane kalité péchés là et zot ti pour toujours cherche les protections d’Allah contre satan le maudit. Mais par contre bane élus des élus d’Allah, bane croyants zot si ene minute zot lécoeur fine tourne vers ça le monde là et zot fine oublier Allah pour ene instant, toute suite zot lécoeur même reproche zot, kot faire zot comprend « to fine donne ene l’autre plisse importance ki to Rab. » Alors les élus d’Allah, zot tourne vers Allah et zot cherche So pardon. Le repentir li faire ou détourner de tout et ou tourne seulement vers Allah. Couma ena ene grande différence entre ene repentir (demande pardon pour péché) et ene repentir ki ou palé ki ou tourne ou pour ene instant vers ça le monde ici bas là, kot ou lecoeur fine tourner vers ene l’autre ki Allah et toutesuite ça même lécoeur là reproche ou et ou bizin ena la pensée du Créateur de l’univers dans ou lécoeur, kot bizin dévide nous lécoeur de tous bane les autres zaffaires, garde seulement nous Rab dans nous le cœur. Bane prophètes aussi parfois zot ti dans l’état de sa bane créatures là lors ça sujet là, mais toute de suite zot faire Tawbah. Eski nous pas conner ki le prophète d’Allah Muhammad (s.a.w) li-même li fine dire ki parfois « mo lecoeur, li envelopper avec ene voile ki pour rode écarte moi avec mo Rab, mais toute suite mo faire Tawbah » et li dire « mo demande pardon avec Allah 70 fois par jour. » Hazrat Adam kan li ti approche li avec ça zarbre ki ti défendre là, et li ti goute ça fruit là, ça manteau paradisiaque ki ti lor li ti tombé et li ti trouve li nu. Hazrat Adam dire : Ene grand malheur ki mo fine commette ene péché et nous (Adam et Eve) fine éloigner de la proximité de nous Bien-aimé (Allah) et après ki nous fine gagne ça kantité faveurs là de la part de nous Rab, astère nous bizin tourne vers nous Rab pour repentir et ça c’est ene profond humiliation. Hazrat Adam fine soumette li devant so Rab et li dire : « O Allah, nous fine faire du tort à nous-même, si to pas pardonne nous, si To pas ena pitié pour nous, nous pour parmi bane perdant. » Ça repentir de Adam et Eve là, Allah ti accepté zot repentance couma fine mentionner dans Quran. Adam ti gagne ça bane paroles là de coté d’Allah. Allah vine vers li, car Allah, Li vine vers celui ki repentir (ki cherche So pardon) ; Allah bien compatissant. Kan le repentir d’Adam fine accepté par Allah le Miséricordieux, bane anges, Gabriel, Michel, et Israfil ti apporte ça bonne nouvelle là à Hazrat Adam. Alors Adam (a.s) ti envie conner ki so Makam (so degré). Allah fine faire li conné ki so descendants zot bizin faire beaucoup de: « zéffort, passe par bane souffrance et bizin repentir beaucoup. ». Allah fine donne li ça l’assurance là ki « si to descendants pour cherche Mo pardon, Mo pou pardonne zot et zot bizin montrer zot humilité, kan zot cherche Mo miséricorde. » Pour ça bane ki pou humilier zot complètement devant Li (Allah), Allah jamais Li pas pou montrer Li avare. Car Allah Li proche et Li réponde zot l’appel. Allah pardonne à bane ki cherche So pardon de zot bane péché et kan la mort joindre zot, zot pour joyeux dans zot tombeaux. Le prophète Noé, jamais li ti pé exempte li avec le repentance, chaque instant li ti pé cherche pardon d’Allah, par contre so peuple fine rejette so parole et li ti bien en colère avec zot et Allah fine puni ça peuple là. Noé li aussi fine faire ene faute pareil (li ti pé suppliyer Allah pou sauve so garçon kan so garçon pas ti croire ni dans Allah et ni dans li-même comme prophète d’Allah) et li aussi li ti implore la miséricorde d’Allah, ene duah ki li fine faire et ki trouve dans Quran : « O mo Maître, Mo demande To protection afin ki mo pas demande Toi quiquechose ki mo pas conner. Si To pas pardonne moi et gracier moi mo pou alle dans la perte. (Surah Hud Ch.11 V.47) De même pour Hazrat Ibrahim (a.s), Allah fine eleve li, fine donne li l’honneur et fine prendre li comme camarade et fine destiner ki li le père des prophètes. Pourtant li pas ti ene exception, li fine montrer so humilité envers Allah et li fine implore Allah So miséricorde. Hazrat Ibrahim (a.s) li ti pé demande Allah pardon dans ene façon extraordinaire. Li ti dire : « O Allah, To même fine créer moi et guide moi, Qui donne moi mo nourriture et mo boisson, et guérit moi kan mo malade, Qui donne moi la mort et après faire moi revivre. Qui mo esperer ki To pour pardonne moi mo bane fautes au jour du jugement et montrer nous bane rites sacrés. Tourne-Toi (O Allah) vers nous, en vérité, to tourne vers bane ki faire péchés, To Compatissant. De même façon pour Moïse, li fine gagne l’honneur pour cause avec Allah et Allah fine accorde li (Moise) pour accompli beaucoup miracles, tels kan li ti dans désert de Tih, Allah ti faire le grand miracle kot li ti gagne la manne et cailles comme nourriture pour li et so peuple. Moise li ti addresse Allah dans ça façon là : « et Moise dire : « Seigneur ! Pardonne-nous, Moi et mo frère, faire nous entre dans To Miséricorde, car To plus miséricordieux des miséricordieux. Le prophète David (a.s) – li ti ene berger – Allah ti accorde li ene grande puissance ; devant le palais de trente mille soldats, li pas fine hesiter pour psalmodier les psaumes, kot ou trouve bane oiseaux vini en nombre pour tende li ; bane de l’eau même arrête zot circulation, bane génies, animaux féroces et même bane insectes, zot faire ene cercle autour David (a.s) sans zot batailler (la guerre) entre zot pour écoute le psaume de David. David (a.s) – ene berger – pendant 40 jours, li ti verse so larmes (couler couma robinet) dans so la prière pour implore Allah ki ré-intégrer li dans la miséricorde Allah. Avec ça kalité duah de David (a.s) Allah fine accorde li So miséricorde et ça ena dans Quran kot Allah pé dire « Nous fine pardonne li ; et en vérité li fine admettre tous près de Nous et pour réserve ene belle demeure pour li. » Salomon, garçon de David (a.s) pareil couma so papa, li ti prophète et ene léroi aussi. Li ti connu pour so l’intelligence, so justice. Par la permission d’Allah, du vent ti sous so control et bane Jinns ti travail pour li. De plus li conne la langue des oiseaux et bane fourmis. Salomon perdi so pouvoir de so bane souveraineté pendant 40 jours, pour ene faute ki fine commette. En effet, ene statue dans so palais et bane là pé adore ça statue là sans ki Salomon conner. Comme punition Salomon fine retirer de So pouvoir comme lé Roi par Allah et li fine vine comme ene mendiant kot li ti bizin étendre so la main, pour gagne ene morceau de pain. Ou pas pour croire le grand Salomon (ki ti le roi et prophète). Bane dimoune moque li, maltraite li et faire bane protestation, crache lors so visage. Ene madame ti pousse li devant so la porte, l’heure li sauver li rentre dans ene seau et après ça nous conner ki Allah fine pardonne li après des épreuves kot bane z’oiseaux, bane génies, bane animals fine vine protège li contre ça dominaire ki li ti pé gagner avec so peuple. L’heure là peuple de Salomon fine comprend ki li-même le grand Salomon. Et tous bane ki ti insulter, maltraite li, fine vine demande li pardon, et Salomon fine rassure zot ki li pas pour blâme zot de zot mauvais traitements envers li, li fine dire zot li pas bizin remerciement, ni zot sympathies ni zot éloigner, car tous ça là c’est bane épreuves de côté Allah et Allah fine envie ça coumsa. Li fine accepter ça comme ene décret d’Allah et Allah fine accepter le repentir de Salomon, ene repentir sincère et Allah fine redonne li so puissance, so prestige et so l’autorité. Kan la tristesse gonfler nous lecoeur par bane péchés ki nous fine commette nous cherche la proximité d’Allah et nous disposer avec nous lecoeur pour entendre la voix de la vérité et aussi pour essaye comprend. Couma nous dire ene malheur apporte ene bonheur et c’est grâce à la tristesse dans le cœur, nous pas bizin personne et ça féconde dans nous même et automatiquement nous cherche le pardon et ene bonheur perpétuel et ene salut éternel. C’est ça tristesse là ki faire nous tourne vers Allah sincèrement. Le remède pour gueri nous l’âme (bestiale) c’est l’humilité. Bane camarade d’Allah, élus d’Allah, bane saints et bane héritiers des prophètes et aussi bane Abdaals (Abdaals c’est bane piliers cachés de la communauté ; couma ene mort, ene l’autre vine remplace li dans so mission) zot pas ti pou mérite ça élévation spirituelle là à ene haute degré sans l’humilité (c’est grâce à l’humilité ki zot fine gagne ça degré spirituelle). Pour faire partie de la communauté camarade d’Allah, élus d’Allah, saints, martyres, héritiers bane prophètes et bane Abdaals c’est l’humilité. Sans l’humilité pas pour capave faire partie de la communauté camarade d’Allah. Kan ou rentre dans ça communauté là, ou pour encourage dimoune pour obéir Allah, tourne vers Allah seul et cherche le pardon d’Allah en faisant (Tawbah) et mette en garde contre tourments de l’enfer. Bane ki pé cherche grandeur dans ça la vie ici bas là, zot pé accumule par hypocrisie l’amour du peuple dans zot lecoeur. Zot faire bane flatterie ki ça nous frère, ça mo bon camarade, zot cause menti beaucoup pour passe bon avec tous dimoune, pour couvert ene menti zot cause 10 menti, tous ça là c’est ki zot envie pour gagne grandeur et dimoune flatte zot et prend zot compte, pour bane l’autorité, zot faire tous pour reste au pouvoir – Ki zot pas pou faire pou ki zot reste toujours au pouvoir ? – cause menti, sème l’argent tellement ça Chirk là fine rentre dans zot lecoeur, zot oublier zot Créateur ki c’est le Créateur ki donne l’honneur à ki Il veut et Li pardonne à ki Il veut et Li puni à ki Il veut sans rendre compte personne. Tandis bane élu d’Allah, zot pas bizin tous ça là zot, simplement assize devant la porte d’Allah, seulement pour gagne ça magnificence divine là. Zot adresse Allah comme ça : O mo Rab, tous pouvoir dans To la main, ça securité là, ça l’honneur là, ça richesse là, tous ça là c’est pour Toi ça et To donne ça à ki To oulé et To pena compte pour rendre personne, et nous, nous ena ene compte pou render avec Toi, parce ki tous ça là ti ene Amaanat dans nous la main ça. Pas ti pou nous tous ça là. Et nous cherche seulement To aide, To protection et Qui To l’ombrage couvert nous pour nous pas bruler avec ça difé l’enfer là. Mo termine ça série Khutba là (lor Tawbah) avec ene extrait de Hazrat Massih Maoud Hazrat Ahmad (a.s) dire ki péché – ki en fait ene poison – li né kan ene dimoune népli ena assez l’obeissance Bondié et li pena ditout l’amour ni affection pour Bondieu dans so le cœur. Destin ene dimoune ki so le cœur fine vine froide sans l’amour Bondié li pareil couma ene pié déraciné ki népli gagne so la vie dépi la terre. Alors ça zarbre là, doucement doucement li sec et li mort, donc, pareil couma ça zarbre là vine sec, péché li faire le cœur vine sec. Kan ene le cœur vine sec dans ça façon là, enan 3 kalité remèdes pour ça d’après la loi de la nature. (1) l’amour (2) Istigfaar, c’est-à-dire, demande pardon avec Allah. Littéralement li veut dire ene désire pou enterré ou sois pou couvert, ki faire dimoune maziner ki aussi longtemps ki racine ene zarbre li en bas la terre, ena l’espoir ki capave produire bane feuille vert. (3) rémède c’est Taubah ki veut dire tourne vers Bondié avec beaucoup humilité pou gagne la vie, et amène ou près are li, faire beaucoup bonne actions pou capave sorti dépi dans ça couverture péché là. Ou na pas gagne Taubah juste avec bane parole. En vérité, ou capave perfectionne ou Tawba avec l’aide bane bonne actions. Tous bane bonnes actions ki ou faire li aide ou pou faire ou Tawba vine pli bon. (Roohani Khazain Vol.12 P.328) Ki Allah donne sakaine parmi nous le Tawfeeq pour nous humilier nous devant Li (Allah) et nous répentir sincèrement pour nous bane péchés ki nous fine commette. Ki Allah pardonne nous et maintenir nous dans le droit chemin pour toujours. Ameen.