Text Box: Bismillah-ir-Rahman-ir-Rahim KHUTBA JUMMAH DE HAZRAT MUHYI-UD-DIN MUNIR AHMAD AZIM BAIT-UL-ZIKR NORD DE MAURICE 4 Avril 2008 (1er Partie lor Ghibbat “Cause derrière lédos ene dimoune”) Après ki Hazrat Muhyi-ud-Din fine souhaite zot tout le salaam, li fine lire Tashahhud, Ta’ouz et ensuite li fine lire Surah Al Fatiha du Quran Shareef et li fine lire Ch.49 V. 12: Yaaa-ayyuhallaziina aamanuj tanibuu kasiiram minaz zann: inna ba-zaz-zanni ismunw-wa laa tajassasuu wa laa yagtabba zukum ba’-zaa. Ayuhibbu ahadukum anyyakula lahma akhiihi maytan fakarihtumuuh? Watta-qullah: Innallaha Tawwaabur-Rahiim. O les croyants, évite faire beaucoup suppositions; certains suppositions, péché. Pas espionner, et pas cause derrière lédos ou camarade. Est-ce ki kikaine parmi ou content mange la viande so frère mort ? Ou trouve ça horrible. Alors craindre Allah, car Allah accepter répentir dimoune et pardonne zot. Aujourd’hui Mo fine choisir pour cause lors sujet de ça verset là. La-dans entre autre chose Allah pé mette en garde la société de bane Momeen (croyants) contre le « Rhibbat ». Rhibbat veut dire Backbiting, cause ene dimoune, contraye ene dimoune derrière so lédos. Et Allah fine mette en garde contre ça, dans bane tel mots si sévère, ki si ene dimoune bien comprend ça, bé jamais li pour approche le Rhibbat. Mais façon ki fine explique ça, montrer ki faire bane dimoune ena attirance pour ene zaffaire si détestable qu’est le Rhibbat. Li attire ou vers li et ou pas capave faire nennié. Allah dire : « O bane dimounes ki fine amène Imaan (la foi), évitez pour gagne bane soupçons, doutes. Et beaucoup de bane soupçons ki tel tel affaire fine capave arrive coumsa, li tellement ene mauvais l’habitude ki certain là-dans certainement vine ene péché. Donc ou pé travers dans ene tel la plaine kot ena beaucoup de pièges ; Ena bane zanimeaux de la forêt. Ou penser ki ou pé bien guetter avant ki ou avancer mais parfois li arriver ki ou alle tombe dans bane piège. Ou sois ou passe près kot la cage bane zanimeaux là et couma dire ou pé invite zot pour attaque ou. Donc, li veut dire ki pas tous bane soupçons ki bane péchés. Non ! Certain bane soupçons ki baser lor la vérité ki correcte, bé auprès d’Allah ça bane soupçons là, pas ene péché. Mais l’habitude de soupçonner ki bien dangereux ! Parceki si ou ena l’habitude de soupçonner bé li bien probable ki ou alle commette certains bane grand péchés. 2ème zaffaire ki fine mentionner, c’est ki pas espionner. En fait, soupçonner ena profonde lien avec espionner. Kan ene dimoune ena ça plaisir pour alle rode et conne faiblesse des autres, bé ça l’heure là so soupçons li bien proche avec bane péchés. Parce ki ene dimoune li pé rode bane mauvais de so frères ou soi so sœur. Si l’habitude d’espionner joine ensemble avec l’habitude de soupçonner, bé lerlà ena ene pli grand possibilité ki ene tel dimoune vine ene pécheur. Lor ça sujet là même, Allah dire ki faudrait pas ou cause contre quelqu’un dans so absence. En fait ça c’est ene résultat naturel ki découle de ça deux premier affaires ki fine mentionner là. Ene dimoune ki ena l’habitude de douter, très vite li tombe à la conclusion ki tel tel affaires fine capave arriver. Et celui ki ena l’habitude d’espionner bé ça dimoune là dans so bane doute et so soupçon li arrive bien près are le péché. Parce ki « Tajjassus » veut dire ki li content cherche défauts des autres. Li envie conner. Alors c’est pas par ene co-incidence ki li pé douter. Non ! Li ena ene objectif bien défini kan li pé rode conner. Et dans bane tel l’occasion bane résultats naturel ki ou retirer de ou bane espionnage ki fine faire ou arrive à bane tel conclusions. 3ème aspé ki bizin guetter, c’est ki faire ene dimoune espionner ? Ki faire li fouiller, li rode conner ? Principalement à cause li ena ene la haine ki cachée pour so frère ou so sœur. Et li pas content ça. Et c’est pour bane dimounes ki ou pas content même ki ou faire Rhibbat. Jamais ou pas pour trouver ki maman, papa pé assizer et pé faire Rhibbat de zot bane zenfants. Ou sois bane zenfants pé contraye bane parents. Si zot faire coumsa, bé li veut dire ki dans zot bane relation ena de tel manquement ki nous appelle la folie. Mais pour faire Rhibbat lor quesqu’un c’est ki faudrait ou pas content li ou soi ena quique jalousie contre li, c’est ça bane affaires là ki faire ou contraye li. Et là-dans premièrement ou espionne li et ensuite kan ou douté et faire espionnage, et ça prend ene forme ki pas nécéssairement vrai. C’est ou doute et ou espionnage ki faire ou tire bane conclusions. Ou calculer ki tel tel zaffaires fine passer et l’heure là ou dire ki tel tel zaffaire fine passer dans ça place là, kan en vrai-dire ou pas ti là-bas. C’est ou penser ki faire dire ça, et trouve ça. Alors puisque ça reflection ki ou fine faire là, fine commençer même lor mauvais intention alors n’importe ki conclusion ki ou tirer kan même ou pas sûre de ça, ou necque commence propage ça pli devant et ou prend plaisir là-dans. Ça c’est tout ene voyage psycologique ki celui ki faire Rhibbat adopter et ki Quran fine mentionner étape par étape exactement couma li été dans la nature humaine. Mais ça c’est pas la seule raison, de cause ene dimoune derrière so lédos. Li pas veut dire ki à part ça bane affaires là péna aucaine autre Rhibbat. Non ! Sans soupçon aussi ena Rhibbat. Par example, si ouvertement ou conne ene dimoune so défaut, c’est-à-dire ki ou pas fine faire aucaine espionnage pour alle conne so bane faiblesses. Et kan ou guette so bane faiblesses là avec la haine et au lieu ki ou essaye élougne so bane faiblesses, ou alle propage ça partout à bane dimounes de sorte ki bane dimounes créer ene distance avec dimoune ki ou fine contrayer là. Couma dire à travers ou causer contre ça dimoune là, so bane mauvais, ou créer bane l’ennemités contre li et ou attane ki bane dimounes side are ou. Avec ça kalité l’intention là aussi bane dimounes faire Rhibbat. Parfois bane dimounes faire le Rhibbat lor bane affaires ki bazé lor la vérité. Mais c’est kan l’intention travers, lerlà li vine ene péché. Sinon li pas ene péché. Ene fois Hazrat Muhammad (s.a.w) en presence d’ene so madame pieuse ti pé mentionne quelque chose lor ene quelqu’un. Madame là fine penser, estce ki ou pas pé faire Rhibbat là ? Du fait ki dimoune là pas présent. Mais bane dimoune ki ena ene grand statut, ene grand rang, kan zot mentionne ene quelque chose lor quelqu’un devant ene lotte dimoune, bé zot pas dire ça avec l’objectif pour créer l’ennemité contre ça quelqu’un là, Non. Anawzobillah ! Li péna ça objectif là, ki celui kip é tender là développe ene la haine contre ça quelqu’un là. Non. Mais en fait li ene conseil ki zot pé donner et zot cite ça comme ene l’example. Li envie dire ki guette ça ti ene mauvais zaffaire. Faudrait pas faire coumsa. Et puisque li péna aucaine mauvais l’intention derrière ça, bé de côté d’Allah li pas compter comme Rhibbat. Et ni jamais Hazrat Muhammad (s.a.w) fine faire Rhibbat. Donc, kan nous guette différent Hadith lor Rhibbat nous arrive à la seule conclusion ki Rhibbat c’est kan ou conne défaut ene dimoune ou soi ou fouiller pour conner et l’heure ou conner, ou fanne ça avec l’intention ki ou abaisse dimoune là devant lizié les autres. Et le fait ki ou pas content ki dimoune concerner là, conner ki ou pé causer lor li, montrer ki ou envie attaque li sans li conner. Ou peur attention li alle conner ki ou pé dire lor li. Dans so absence ou pé dire bane tel zaffaires lor li ki li pas là pour défendre li. Donc, si ça ou l’intention, bé li ene très grand péché. Et en donnant ça example là, Quran dire « Estceki quelqu’un content mange la chaire de cadavre de so frère ? » Kan ou entende ça même ou gagne ene dégoût contre ça. Ki faire ou gagne dégoût contre ça kan pourtant c’est exactement ça même ki ou pé faire dans ou la vie de tous les jours. Et ici pé faire référence à bane Momeen (croyants), pas seulement ou bane frères de sang. Donc, kan ou pé cause contre zot, bé en fait ou pé mange la chaire de cadavre et ça l’heure là ou pas gagne délicat, mais ou faire ça avec plaisir. Donc l’example là li ene seul. Ene côté ou jouir pour faire ça de lotte côté ou gagne délicat. Li ene contradiction de ou la vie. Li pas correcte. Ou bizin guette tous les deux zaffaires avec ene seul mesure. Après ene tel example et ene tel conseil, là aussi ene dimoune prend plaisir à faire Rhibbat. Ça veut dire spirituellement li péna capacité pour gagne dégoût pour certains zaffaires. Li entende ceratins example, et li amène Imaan. Tant mieux. Mais en ce qu’il s’agit de so propre être, li penser ki ‘moi, mo pé prend plaisir are ça. Moi, mo pas pé gagne aucaine dégoût pour mange la chaire de cadavre de mo frère’ ; ce ki veut dire k iso l’angle de voir les choses même fine changer. L’angle dans laquelle li pé guetter, li pas l’angle dans laquelle Allah guette ça bane choses lça bane choses là. Li non pli l’angle ki le prophète guette ça bane zaffaires là. Donc, li pas seulement ene maladie du péché, Non ! Mais ena ene profonde manquement dans le caractère même, dans le goût même. Et so reformation li comparativement pli difficile. Si ene dimoune bien conscient et bien comprend le péché, et si temporairement li influencer et attirer vers certaine péché, bé chaque fois li faire Tauba et li ré-saizi, et ça jamais ou pas pour trouve bane tel remords parmi bane ki faire Rhibbat. Jamais ene dimoune pour dire ki li fine faire Rhibbat, li ‘fine mange la chaire de cadavre de mo frère et astère mo pé gagne dégoût pour ça.’ Jamais li pour dire, ‘faire duahs ki Allah pardonne moi, et protège moi contre le mauvais résultat de ça action là. Jamais ou pour entendre kikaine dire ou ça, ki ‘faire duah pour moi, pour ça villain chose là.’ Fine déjà arrive ou ça, ene quelqu’un ine demande ou pour faire duah pour ça. Parce k iso goût même fine changer, kot le goût même changer bé ene dimoune pas conscient même, de mauvais côté du péché là. Et ene tel dimoune, malgré ki li fine entende conseil là, mais chaque coup li gagne cogner. Mais si li même li mette li à la place de ça victime là, à la place de celui contre ki li pé faire Rhibbat là, bé lerlà probablement li ti capave comprend. Pour bien comprend ça, magine ene coup ki ou pé faire Rhibbat contre ene quelqu’un et ene coup li paraître devant ou. Lerlà, ou capave constater couma ou et tous dimounes ki pé écoute ou ensemble gagne déconcerté. Et zot rode faire tout pour couvert séki zot ti pé dire là. Et lerlà pour couvert ça, zot même alle jusqu’à cause menti. Zot dire ki en fait zot ti pé cause lor ceci, nous ti pé dire cela. Mais lerlà kan zot retrouve zot ene côté, bé zot gagne riyé. Mais ene riyé de la honte ! Ene riyé déconcerter. Dans zot même zot oulé dire ki zordi fine bien maille nous. Dimoune ki nous ti pé causer là ene coup li fine vini. Tous ça là c’est bane signes d’injustice. Zot conscience dire zot ki zot ti pé commette ene mauvaise chose. Sinon zot pas ti pour gagne honter etc. Parfois li arriver ki ou pé cause lor ene dimoune mais avec bon intention. Ou pé causer pour faire comprend. Et même ki ou alle conner ki li par derrière et li pé entendre, bé là aussi ou pas senti ou embarrasser. Au contraire puisque ou pé cause ça dans ene bon façon et avec bon intention alors ou pas gagne honter kan même dimoune concerner là tender ou pas. Forçer ou capave présente li excuse et ou dire li ki si to fine blesser par ça, mo présente mo excuse. Mais séki mo fine dire là li correcte. Li ene réalité. Et facilement ou capave conner avec certitude si pas ça l’heure là, ou pas pé commette ene péché, ou sois ou pas pé faire le Rhibbat. Séki ça l’heure là ou pas pé présente nennié pour ou défense et ensuite même séki ou fine dire là li pas créer ene la haine et ene distance entre ou et ça dimoune là. Donc, ena deux kalité possibilité de Rhibbat. Ene c’est avec des mauvais intentions ou dire bane zaffaires mensonges juste pour attaque dimoune là. Ena ene lotte c’est ki avec mauvais l’intention ou répanne ene zaffaire vrai. Juste pour créer ennemité. En ce ki concerne causer menti là li ena deux aspé. Ene c’est le doute, ou soupçonner et ou faire ça dans ou l’avantage et ou dire ki peut être c’est ça même ki fine arriver. C’est ça partie là ki ena plisse connection avec le Rhibbat. Kan cause menti clairement et ouvertement là, ça nous pas appelle Rhibbat. Ena ene lotte nom pour ça. Ena ene zaffaire coumsa fine présenter devant Hazrat Muhammad (s.a.w). Dans Muslim ‘Kitab ul Bir’, Hazrat Abu Huraira (r.a) rapporter ki Hazrat Muhammad (s.a.w) fine demander, ‘estce ki zot conner Rhibbat ki été ?’ Bane sahaba fine réponne ki ‘Allah et So Rassool conne mieux. Lerlà le prophète (s.a.w) fine dire ki le Rhibbat c’est kan ou cause ou frère derrière so lédos d’ene tel façon ki li pas ti pour content, si li ti là. Bane sahaba fine demander, ki ‘si séki nous pé dire là, li vrai, et si nous pé dire ça dans so présence estce ki là aussi li pour Rhibbat même ?’ Le prophète (s.a.w) fine dire ki si li ena ça défaut ki ou fine causer dans so l’absence là, bé li Rhibbat. Et si ça ki ou fine dire là li faux bé à ce moment là li ene allégation. Li ene blâme. Et ça li ene pli grand péché encore. Li ene péché si grave ki Quran fine prescrire ene punition bien sévère pour ça. Allah bien encolère avec ça. Donc, dans les deux cas, péna aucaine raison ki ou commette ene tel zaffaire. Si li vrai, li vine ene Rhibbat et si li ene mensonge, bé lerlà li ene fausse allégation. Et li ene pli grand péché encore. Si li ene vrai causer, bé li Rhibbat dans ça sense là ki couma dire ou frère fine mort et ou pé assizer ou pé cause li. Frère là li pas là, li sans défense et ou dans so absence ou fine attaque li. Ridiculise li. Et fausse allégation veut dire, couma dire ou pé assassine quelqu’un. Dans le monde spirituel ene blâme li équivaut à ene crime. Donc, li ene péché de meurtre. Li pas pli détestable ki mange la chaire d’ene cadavre, mais li beaucoup pli injuste ki ça. Et ou bizin rendre compte pour ça. Donc, pas capave ena prétexte pour ça. Si ou pé faire le Rhibbat et ou gagne plaisir à faire ça et ou pé guette ou frère comme ene dimoune bas. Ou pé boufonne li, ou pé ridiculise li et ou pé cause li d’ene tel façon ki si ene coup li présente devant ou, ou arrêter sec et personne péna le courage pour dire nennié devant li. Tous ça là, c’est le Rhibbat. Mo termine 1er partie de ça Khutba là ici-même. Insha-Allah Vendredi prochain, nous pour continuer so 2ème partie. Ki Allah aide chacaine parmi nous, pour ki nous pas tombe dans ça kalité péché là et Allah épargne nous de So punition bien sévère et mette nous tous sur le chemin droite. Insha-Allah.