|
Bismillah-ir-Rahman-ir-Rahim
Khutba Jummah De Hazrat Amir’ul Momeneen Muhyi-ud-Din Khalifatullah Munir Ahmad Azim
Le 6 Juin 2008
Après ki le Khalifatullah fine saluer zot tous, li fine commence lire le Tashahhud, Taouz et Surah Al Fatiha et ensuite li fine lire ça bane versets suivants là :
Ch.2 Al Baqara Versets 272/273
Laysa alayka hudaahum wa laa-kinnallaaha yahdii may-yashaaa. Wa maa tunfiquu min khayrin fali-anfusikum : wamaa tunfiquuna illab-tigaaa’a wajhillaah. Wa maa tunfiquu min khayriy-yuwaffa ilaykum wa antum laa tuzlamuun.
C’est pas to devoir (O Prophète), pour guide zot, mais c’est Allah ki guide bane ki Li oulé. Seki ou dépenser en bien, profite ou même. Seki ou dépenser, seulement avec l’intention pour trouve figure Allah, et seki ou dépenser en bien, ou pou gagne li en entier et aucaine injustice pas pour faire ou.
Bane versets Quran ki mo fine lire là, dans premier verset quoique ki pas fine mentionne le nom de Mohammad (s.a.w), li sous entendu. Allah dire : « O Mohammad (s.a.w), c’est pas toi ki pour donne zot guide, mais c’est Allah seulement ki guide celui ki Li envie. » Maintenant nous ki fine sorti pour guide le monde, faudrait ki nous magine ça bien, ki tant ki Allah pas aide nous, tant ki Allah So décret pas avec nous, nous pas pou capave guide personne. Bane capacités de Guide ki Hazrat Mohammad (s.a.w) ti gagner, li ti connecter avec Allah So être. Parce ki so l’intention ti mélanger nette avec bane l’intention d’Allah. Apparemment c’est li ki ti pé donne guide, mais en fait c’est Allah ki ti pé donne Hidaayat.
Donc ici fine explique ça clairement afin ki bane dimoune pas tombe dans ene idolâtrie. Tous bane cadeaux et bane capacités ki Hazrat Mohammad (s.a.w) ti ena c’était bane cadeaux et faveurs ki mélanger totalement dans Allah. Comme-ci c’était ene. Et puisque li ti soumette li totalement à Allah, à tel point ki so la voix ti couma dire la voix d’Allah, et li ti paraître ki c’est li ki ti pé donne guide à bane dimounes, mais en fait pena personne aparte Allah ki ena pouvoir lor bane lecoeurs.
Si vraiment li ti ena ça capacité là, bé ki faire li pas ti pou guide Abu Jahl ? Abu Jahl ti parmi ça deux dimounes ki le prophète ti désire ki zot gagne Imaan. Donc ça montrer ki ene intention pure d’ene prophète pure pas suffit, tant ki Allah So décret pas accompagne ça. Et kan nous dire ça, li pas du tout ene offense, ene humiliation pour Hazrat Mohammad (s.a.w). Naouzobillah min Zaalik. En fait ena ene grand et profond leçon pour nous là-dans. Leçon là dans, c’est ki si ti laisse ça zaffaire de donne Imaan là lor bane dimounes, bé li ti possible ki ena bane faux, ki pas mériter même d’être guider, alle gagne bane guide zot aussi.
Ena ene bane dimoune malchanceux lor lesquels Allah fine fini décider ki certainement zot pour gagne punitions. Si ça ti lor bane banda, bé Hazrat Mohammad (s.a.w) ti pour envie ki Abu Jahl aussi gagne Imaan. Lerlà tout dimoune ti pour gagne la foi. Insaan pena bane connaissances intérieur. Nous bane connaissance ena ene limite. Bane zaffaires ki li pé trouver aussi li pena ene full connaissance de ça. Maintenant kot li pour alle conne bane zaffaires ki li pas pé trouver ?
Donc ici Hidaayat veut dire faire zot rentre dans la religion. Lerlà bane dimounes ki pour cause la religion ditort, zot aussi ti pour rentre dans la religion là kot zot capave conne bane dimoune là. Donc, Allah pé dire ki « Ça zaffaire de donne la foi là, ça c’est Mo travail ». So 2ème aspect là-dans c’est ki pour donne guide en profondeur, ça li pas dans capacité de bane dimounes. Et ça aspect là émerger devant nous dans ene lotte façon aussi.
Ti ena beaucoup bane dimounes apparemment ti gagne Imaan et zot fine déclarer ki Hazrat Mohammad (s.a.w) est ene prophète d’Allah. Zot dire ki « Nous faire serment ki to ene prophète d’Allah. » Mais de lotte côté Allah dire ki, « Moi Mo donne témoignage ki toi to ene vrai prophète d’Allah et Mo donne témoignage ki ça bane dimoune là zot menteurs. »
Donc malgré ki zot fine vine dans le cercle de l’Islam, là aussi zot pas fine capave être guider. Zot pas fine gagne Hidaayat. Donc Hidaayat pas veut seulement dire ki ou vine dans ça cercle là. Hidaayat est ene action, ene zaffaire bien profond et c’est celui ki Allah envie, ki gagne guide. D’ailleurs Hazrat Mohammad (s.a.w) pas fine capave vine ene source de guide pour ça bane hypocrites là.
Au contraire ene bane dimoune zot maladies augmenter et ça c’est ene zaffaire naturel. Parceki si ou pas honore ene dimoune ki fine faire faveurs lor ou, bé ou augmenter dans le péché et ou pas reste digne d’être guider. Dans ça situation là kot ou près are ça bienfaiteur là, et là aussi ou pas gagne guide, bé c’est l’opposer de guide ki créer. Kan même ou pli proche d’ene pli grand bienfaiteur, si ou lecoeur mauvais bé ou bane mauvais pour augmenter plisse.
Donc, Allah pé dire : « O Mohammad (s.a.w), donne guide là, c’est pas to travail, mais c’est Mo travail. Certes toi to ena le désire ki tout le monde gagne Imaan, mais ça c’est ene zaffaire ki dépanne lor Allah. Donc, to pas pour capave accompli ça désire là toi. » Ensuite Allah dire, « Ki tout seki ou pour dépenser, li dans ou propre bien, dans ou propre intérêt. » Ici pas fine dire ki tout bane dibiens ki ou dépenser n’importe comment, li dans ou propre avantages. Parceki ena beaucoup bane dimounes zot dépense bane tel di biens ki cause zot propre ditort.
Zot détruire zot la vie religieuse aussi et zot duniya (le monde) aussi détruire. Ena des milliers de bane dimoune ki pé dépense zot l’argent lor la drogue. C’est pourquoi Quran pas pé dire ki tout seki ou pé dépenser, li pour ou propre bien être.
Quran pé dire ki tout seki ou dépenser li pour ou propre bien être à condition ki; enfin ena ene condition ki fine metter. Dans beaucoup traduction ça 2ème partie verset zot pas traduire li.
Donc, verset là c’est coumsa : « O bane Momeen tout seki zot dépenser li pour zot propre bien parceki zot dépenser que pour cherche le plaisir d’Allah. Donc, kan ou pé dépenser que pour gagne le plaisir d’Allah, bé li automatique ki n’importe quoi et n’importe comment ou dépenser, certainement li dans ou propre avantages.
En connection avec ça même sujet ki Hazrat Mohammad (s.a.w) fine dire ki « Si pour le plaisir d’Allah ou mette ene boucher manger dans la bouche ou madame, bé li dans ou propre intérêt et ça pour compte comme ene Ibaadat pour ou. »
Ensuite Allah faire nous comprend kan avec ça condition là, ou dépenser, bé ça l’argent ki ou dépenser là, ça aussi pour retourne à ou. Façon ki fine présente ça là est bien intéressant. En même temps Allah pas garder, bane di biens ki ou dépenser, Li retourne ou ça et kan Li retourne ou ça Li retourne ou ça en augmentation, en le multipliant.
« La Touzlamoune » veut dire ki Allah pour récompense ou autant ki ou pas pour capave même penser. Vrai récompense de dépenser pour le plaisir d’Allah, c’est ki dans chaque aspect li pour ou propre bien-être, dans ou propre l’avantages, de partout ou pou gagne Barakat. Et ensemble avec ça, ou gagne ça ki ou ti dépenser là aussi. Li pareil couma Hazrat Yusuf (a.s) kan li fine donne so bane frères rempli des provisions. Li fine dire donne zot, zot bane di biens ki zot ti donné aussi. En fait bane prophètes d’Allah, zot gagne ça bane couleurs d’Allah là même. Bane frères la fine prend bane provisions et fine bien content. Zot fine aller et et kan zot pé raconte ça zot papa, zot fine ouvert sac de provision, zot fine encore pliss content kan zot fine constater ki bane dibiens ki zot ti fine donner, aussi fine retourner. Et zot fine dire ça zot papa.
Donc ici aussi li exactement le même sujet. Allah dire ki ou pour gagner tout seki ou pé roder. Ou bane dépenses là pour donne ou tout avantages mais kan ou pour ouvert ou parcelle ou pour trouver avec étonnement ki seki ou ti dépenser aussi, ça aussi fine retourne ou.
Mais Hazrat Yusuf (a.s) li, li ti ene Insaan, li fine capave retourne bane là exactement pareil couma zot ti donner, mais kan Allah retourne li, li si tant beaucoup ki ou pas pour capave prend compte. Li tellement récompenser. Ensuite Allah dire ki kan zot pé dépenser pour le plaisir d’Allah, bé li pas veut dire ki nous dépense que lor nous bane zenfants seulement. Ça aussi c’est ene façon pour gagne le plaisir d’Allah. Kan ou dépense lor ou madame et bane zenfants façon ki zot en droit, et ou faire ça pour le plaisir d’Allah., bé c’est ene bon zaffaire. Mais ici Allah pé dire bane ki dépenser pour le plaisir d’Allah en sacrifiant zot propre droits et zot dépense lor bane dimounes ki en fait pena droit directe lor zot.
Mais c’est bane dimounes ki fine pauvres pour la cause d’Allah ! C’est pourquoi fine mentionne zot séparément. Au contraire ici pas fine mentionne le mot « et ». C’est-à-dire, zot dépenser lor zot et ensuite lor bane pauvres. Ici, Allah pé dire bane ki premièrement dépenser lor bane pauvres. Ici, li pas le sujet ki fine mentionner dans différentes places dans Quran dépense lor bane pauvres. Li pas ça ici. Ici pé mentionne bane tel pauvres ki fine vine pauvres pour la cause d’Allah. Et pour ça bane dimoune là, kan ou donne zot, li pas comme ene sadqua. Non ! Au contraire li ene l’occasion pour ou dépense lor ça bane dimounes là. Allah pé dire si ou pé dépenser pour gagne le plaisir d’Allah, bé premièrement, c’est ça bane pauvres là zot droit, ki ou dépense lor zot. Bane ki pour la cause d’Allah fine vine pauvres. Bane ki fine emprisonner dans le chemin d’Allah. Ena ene bane dimoune ki fine enfermer dans ene place et zot pas libre pour sorti alle dans ene lotte place pour gagne zot vivre pour zot travail etc. Zot pena ça liberté là.
Donc, zot obliger reste là-bas même. Mais ici pé mentionne bane dimoune ki pour la cause d’Allah, volontairement zot même pas sorti alle aucaine part. Zot couma dire attache zot même. Par example bane Ashabé Souffa ki ti ena de capacités de travail etc. mais juste pour reste près du prophète et pour entende so bane paroles pour faire Khidmat-é-Deen, zot fine préfère passe le reste de zot la vie devant la porte du Masjid.
C’est bane ki malgré zot bane capacités, zot fine laisse zot vine pauvre pour la cause d’Allah. Si ou dépenser lor ça bane dimoune là, bé li ene meilleur moyen pour la cause d’Allah. Bane Musulmans, spécialement bane Ansars de Madina, zot ti ena ça l’habitude là, ki la nuit, li jour zot ti pé alle rendre visite ça kalité dimoune là et présente zot des cadeaux etc. Et parmi bane cadeaux ki Hazrat Mohammad (s.a.w) ti pé gagner, li ti pé garde ene partie pour ça bane dimounes là.
Ena ene partie de ça verset là pé dire ki ti ena ene bane ki pas ti ena la capacité même de sortir et alle en dehors pour gagne zot la vie. Ça aussi li correcte. Mais ti ena ene bane ki ti tellement emprisonner, tellement plonger dans l’amour d’Allah et So prophète ki même si zot ti envie et zot ti ena capacité de sorti et alle en dehors pour travail etc, mais là aussi zot pas ti pé capave. Si tant ça l’amour du prophète là ti attache zot. Hazrat Abu Huraira (r.a) est ene l’example de ça bane kalité dimoune là. Kan fine demande li « Ki to faire ici et ki faire to reste là ? » Li fine reponne ki « En fait ene grand partie de mo la vie fine passer en dehors de l’Islam, et au contraire fine passer dans l’ennemité de l’Islam. Mais maintenant fine reste bien peu pour mo vivre. Couma est-ce ki possible maintenant ki ça tiguitte letemps ki rester là, aussi mo passe li loin de Hazrat Mohammad (s.a.w). Li impossible. Maintenant mo envie dépense chaque moment de mo la vie ici même. Parce ki kot nous conner ki kan Hazrat Mohammad (s.a.w) pour sorti et dire ene parole, est ce ki mo capave alle manque ça ? »
Ça c’était l’état de so lecoeur ki li fine exprimer dans so propre mots. Mais ici, mo fine mention li dans mo propre mots.
Effectivement li ti envie dépense chaque moment de so la vie, près avec le prophète (s.a.w). Et li ti content entende bane paroles. Alors li fine penser, « ki faire depi zenfant même mo fine ratte ça bane l’occasion là », et effectivement ça quelque années ki li fine passer près du prophète (s.a.w) là, li fine collecter autant de Hadith ki pena aucaine autre Sahaba ki fine gagne l’occasion rapporte autant de Hadith ki Hazrat Abu Huraira (r.a) fine rapporter. Et Allah fine garde li vivant un peu longtemps pour ki li capave raconte tout ça bane paroles ki li fine tender là.
Donc ça c’est bane dimounes ki pena même ça capacité de sorti en dehors et alle travail. Au contraire nous capave dire ki zot ti ena capacités et tout bane habilités mais seulement zot ti tellement emprisonnées dans l’amour d’Allah ki zot pas capave même sorti.
C’est ça bane dimoune là, ki pé mentionner en priorité ici. Ensuite Allah dire bane ignorant penser ki ça bane dimounes là zot riches. Maintenant couma capave pense ça bane pauvres là comme riches ? Bane ki zot pauvreté ti bien apparent, couma capave pense ça pour zot. En fait li veut dire ki c’est bane dimounes ki pas laisse zot bane nécessité visible. Zot pas montrer zot bane besoins. Ena ene bane dimoune ki faim, zot montrer ki zot faim afin ki quelqu’un guetter et li reconnaite ki en fait ça dimoune là faim. Ena ene lotte bane pauvres ki à travers zot bane linge déchirer et sale etc. zot montrer zot pauvreté. Mais par contre ena ene lotte bane pauvres ki tous les jours lave zot linge et zot habiller bien propre de sorte ki zot pauvreté pas apparent.
Donc bane ki vine pauvres pour la cause d’Allah, zot pas attane nannié de bane dimounes. A cause de ça tout bane dimounes du monde pé donne ça témoignage là ki en fait zot pas besoins nannié. Zot pé assiser tranquille, zot pena aucaine nécessité. Mais en fait Allah pé dire laisse bane ignorants dire seki zot envie ! Mais en fait c’est bane dimounes ki ou capave reconnaite zot par zot fronts, zot visages. Allah dire c’est bane dimounes ki jamais fine agace bane dimoune en mendiant. Zot pena même ça l’habitude là. Après avoir mentionne ça, Allah dire ki tout seki zot dépenser Allah conner parfaitement. Ici, pé mentionner ki Allah conner seki ou faire. En fait Allah envie dire ki bane tel dimoune ki nous pé mentionner ici, si ena bane dimoune ki faire zot Khidmat, aide zot juste pour montrer dimoune, bé c’est bane dimoune bien ignorants ki capave faire ça. Bane dimounes ki fine vine pauvres pour la cause d’Allah et lor là zot pas laisse zot pauvreté apparemment, bé li pour bien ignorant de ou part ki ou aide ça bane dimounes là ouvertement, ou montrer ki ou pour aide zot.
Au contraire li pour ene signe de bassesse de ou part. Couma dire ou pour rode faire bane là conner ki c’est nous ki pé faire faveurs lor zot.
A ce moment là ou pou vine bane dimoune ki dévoile la pauvreté de bane dimoune ki ti cachiette, zot pauvreté devant le monde.
Donc pareil couma mo ti dire ki ti ena bane Sahabas ki ti ena bane bel sagesse, bel connaissance, c’est zot ti pé aide ça kalité dimoune là soi la nuit ou soi zot ti pé necque envoye soi kot Hazrat Mohammad (s.a.w) parce ki zot ti conner ki ene fois ça pour arrive kot le Saint Prophète (s.a.w), bé automatiquement ça bane dimounes là pour gagner. Donc dans ça aspect là, kan pé mentionner ki Allah conne tout, c’est ene zaffaire bien intéressant. Ou pas capave cachiette nannié d’Allah. Et si ou pé donne à ça bane dimounes là, estce ki ou croire ki Allah pas au courant ? Donc, Allah dire ki zot bizin conner ki Li parfaitement au courant de n’importe quoi ou pé dépenser.
Maintenant dans le prochain verset Allah vine lor ene sujet générale. Avant ti pé mentionne ene catégorie de dimoune spéciale ki abandonne zot droit et dépense lor bane dimounes ki fine vine pauvres pour la cause d’Allah. Ici, dans ça verset là, Allah pé dire ki dans Ummat de Hazrat Mohammad (s.a.w) fine ena beaucoup bane dimounes ki dépenses zot di biens la nuit aussi et li jours aussi. En cachiette aussi et ouvertement aussi. Ça bane dimoune là zot récompense li avec Allah. Maintenant nous bizin guetter ki faire malgré ki li fine dépenser ouvertement, ki faire fine mentionne récompense. Kan pourtant avant fine mette beaucoup importance lor dépenser en secret. Maginer ki dans ça verset là même ena so réponse. Mais ici fine mentionne donne en cachiette avant, ensuite fine mentionne ouvertement ; seki veut dire ki Allah conner ki c’est bane dimounes ki donner en cachiette aussi.
Bane ki lever le soir pour Tahajjud, bé so Namaz du matin est ene vrai Namaz. Parce ki kan li ti lever pour Tahajjud, ki sanlà fine trouve li ? Personne. Donc, zot cachiette là, protège zot ouvert là. Et li veut dire ki même kan zot donner ouvertement aussi zot toujours donner avec des bonnes intentions même. Zot donner ouvertement pour ki ena ene esprit de compétition et afin ki chacun rode dépasse so camarade et enfin ki le plan soi connu de tout.
Si tout bane sacrifice financier donner en cachiette même, bé bane ki faible, faible dans le Zakaat et Chanda, bé tout le temps, zot pour reste priver même. Donc parfois kan dépenser ouvertement, li pas pour ene show, non ! Mais li avec l’intention pour généralise ça bon action là. Nous, nous bizin seulement Allah So plaisir. Ler là Allah pour ena So vue lor ou et ou pour gagne beaucoup de Barakat. Ici aussi ou di biens pour augmenter et là-bas aussi ou di bien pour augmenter. Et ensuite kan ou alle là-bas, ou pour gagne ou récompense ki Allah fine garder pour ou.
Donc, Insha-Allah, ki Allah donne le Jamaat Ul Sahih Al Islam, l’occasion pour ki tout les temps préserve ça l’esprit de sacrifice là. Et bane dimounes ki priver de n’importe quel aspect de ça, zot bizin maginer ki en fait zot pé priver de bane avantages de zot propre être. A part ça, zot pas pé faire nannié.
Donc, ki Allah grandi nous le coeur d’ene tel façon ki tout le temps nous continuer à dépenser et nous augmente nous dépense pour le plaisir d’Allah. La-dans même ena la vie pour le Jamaat Ul Sahih Al Islam et la vie pour ça siècle ki nous été là. Ameen. |