Bismillah-ir-Rahman-ir-Rahim

 

KHUTBA JUMMAH

DE HAZRAT AMIR’UL MOMENEEN MUHYI-UD-DIN

 

7 MARS 2008

 

(BAIT-UL-ZIKR – NORD DE MAURICE)

 

 

Hazrat Amir’ul Momeneen Muhyi-ud-Din fine commence Khutba avec le Tashahhud, Ta’ouz et Surah Al Fatiha, après li fine lire ça bane versets suivant là: Surah Az-Zumar Ch.39 V.74

 

V.74: Wa siiqalla ziinattaqaw Rabbahum ilal Jannati zumaraa Hattaa izaa jaaa-uuhaa wa futihat abwaabuhu wa qalaa lakum khazanatuhaa “salaamun alaikum tibtum fadkhuluuhaa khaalidiin”

 

Bane ki fine suive chemin zot Maître pour dirigé en groupe vers Paradis. Kan zot arriver, bane la portes pour déjà ouvert et so bane gardiens pour dire zot: salut ou tous. Ou ti faire bon; Alors entrer pour toujours.

 

Tout grandeur pour Allah, nous faire So louanges et nous cherche So aide et nous cherche So pardon et nous repentir à Li et nous cherche refuge avec Allah contre le mal de nous-même et contre bane mauvais parmi nous actions. Celui ki Allah guidé, péna personne pour égare li et celui ki li laisse egarer, péna personne pour capave guide li.

 

Bien souvent nous écoute beaucoup lors bane punitions ki Allah fine reserver pour bane ki fine vivre dans désobéissance Allah lor ça la terre-là. Mais li bon ki nous conné ki Allah fine reserve ene récompense ki pas capave penser couma li pour été pour bane ki vivre dans l’obéissance Allah. Si seulement nous conne ene tiguite saki Allah fine preparer pour So bane serviteurs, nous pour trouver ki ça bane soi-dizant plaisirs lor ça duniya-là c’est ene pure l’attrape du satan ki dévié nous dépi le vrai plaisir ki Allah fine gardé.

 

Le Paradis li pas difficile pour gagne accès si seulement nous realise ki nous séjour lor ça la terre-là li pour quelques temps et nous vivre ça tiguite létemps là dans l’obéissance Allah et Insha-Allah nous pour réussi.

 

Létemps nous pour lire ça quelques descriptions ki fine faire mention dans Al-Quran et dans Hadith lor Paradis, nous pour trouver couma le monde li petit et saki li contenir c’est vraiment éphémère (temporaire). A ce moment-là nous ena pour faire ene sacrifice pour contrôle nous lor ça la terre-là et la récompense, Insha-Allah, pour énorme.

 

Tous croyants ki fine vivre lor ça la terre-là, ti pour oulé ene jour trouve so place dans ça paradis éternel-là. Alors nous demande Allah, pécheurs ki nous été, pour pardonne nous et accorde nous ene jugement facile et donne nous ene ti place dans So paradis par So Miséricorde ki li possède. Ameen.

 

Si nous essaye comprend couma paradis été jamais nous pour capave comprend ça kitchose-là.

 

Dans ene Hadith Qudsi ki trouve dans Bukhari le prophète Muhammad (s.a.w) pé dire ki Allah pé dire: “Mo fine prepare pour Mo bane bons serviteurs saki lizié jamais fine trouvé, ki z’oreilles pas fine tendé et l’esprit pas capave comprend”.

 

Ene lotte Hadith dans Bukhari, recite par Sahl Ibn Sad Al Saïdi kot le Messager d’Allah (s.a.w) pé dire: “Ene ti place dans Paradis dimension ene fouette li meilleur ki ça le monde là et tout saki li contenir”.

 

Kan nous guette ça le monde là et tous saki li contenir nous reste hébété. Nous étonné et surtout kan nous alle dans bane pays kot ena ene kantité développement. Mais pourtant Allah pé faire nous conné ki ça le monde là vraiment li péna aucaine valeur de saki Li (Allah) fine réserver pour So bane serviteurs, kot là nous trouve ki l’espace ene fouette ena pli valeur ki ça le monde là et saki amène nous à dire ki péna doute ça paradis là c’est extraordinaire. L’espace ene fouette ramasse ça le monde là et paradis li-même couma li pour été.s

 

Kan bane habitants du paradis pour arrive devant bane la porte du paradis, c’est pas ça bane tapis rouge ki mette lor la terre pour accueillir bane tyrants et les autres, mais c’est avec le mot “SALAAM” ki bane anges ki pour accueillir bane habitants du paradis.

 

Couma fine dire dans ça verset Quran ki mo fine lire là “Bane ki peur zot Rab, pour conduire zot par groupe au paradis. A zot arrivé, so bane la porte pour ouvert et so bane gardiens pour dire zot: “La paix lor zot. Zot ti bon. Entrée là-dans pour tout les temps” (Ch.39 V.74)

 

Dans ene Hadith ki trouve dans Bukhari, recite par Abu Said Al-Khudri (r.a) pé rapporté ki le prophète (s.a.w) fine dire: “Bane croyants pour être sauve dépi l’Enfer, ensuite zot pour reste lor ene pont entre paradis et l’enfer, ensuite zot pour réglé zot compte ene à l’autre pour n’importe ki mal ki ti exister entre zot lor la terre juska ki zot pour être purifié et pour permette zot rentre dans paradis. Par Celui dans la main de ki l’âme de Muhammad été, sakaine pour conne so place dans paradis, plisse ki li ti conne so place dans ça le monde là”.

 

Bane croyants kan zot pour rentre dans paradis zot lécoeur pour propre, pas pour ena aucaine mauvais ene à l’autre.

 

Premier dimoune ki pour rentre dans paradis c’est le prophète Muhammad (s.a.w) et premier ummah (nation) ki pour rentre dans paradis c’est so ummah et premier de so ummah ki pou rentre dans paradis c’est Abu Bakr Siddiq (r.a).

 

sAnas (r.a) pé rapporté ki le prophète Muhammad (s.a.w) fine dire: “Mo pour être le premier ki pour frappe lor bane la portes du paradis”. (Muslim)

 

 

Dans ene l’autre Hadith ki trouve également dans Muslim récité par Anas (r.a), le Messager d’Allah (s.a.w) fine dire: “Mo pour vine devant la porte du paradis et mo pour demande ki li ouvert. Gardien-là pour dire: “Ki sanlà?” Mo pour réponde: “Muhammad”. Gardien là pour dire: “Mo fine être ordonne pour pas ouvert la porte pour n’importe ki avant toi”.

 

Abu Huraira (r.a) fine rapporté ki le prophète d’Allah (s.a.w) fine dire: “Nous bane dernier mais nous pour le premier le jour de la Résurrection. Nous pour être le premier parmi bane nations pour rentre dans Paradis.” (Bukhari & Muslim)

 

Abu Dawud pé rapporté dépi Abu Huraira (r.a) ki le prophète (s.a.w) fine dire: “Jibreel fine vine vers moi et fine montrer moi la porte du paradis par ki mo ummah pour rentrer.” Abu Bakr fine dire: “O Messager d’Allah (s.a.w), si seulement mo ti avec toi pour guette ça! Le Messager d’Allah (s.a.w) fine réponde: “Mais toi, O Abu Bakr, to pour être le premier de mo ummah pour rentre dans Paradis.”

 

Abu Bakr (r.a) pé rapporté ki le Messager d’Allah (s.a.w) fine dire: “Mo fine être informé ki 70,000 de mo ummah pour rentre dans paradis sans bizin rende compte. Zot visages pour couma pleine lune et zot lécoeurs pour couma ene seul. Mo fine demande mo Rab, ki li être Exalté, pour plus et Li fine donne moi, ensemble avec 70,000 pour ena encore.” (Ahmad)

 

Ans ça le monde là, bien souvent c’est bane pauvres ki accepter le Message d’Allah plus. Et li très logique ki c’est zot ki bizin les premiers pour rentre dans paradis. Dans ene Hadith, Abdullah Ibn Amr (r.a) pé rapporté ki le Messager d’Allah (s.a.w) fine dire: “Bane pauvres de bane Muhajiriin pour rentre dans paradis 40 banané avant bane riches”. (Muslim)

 

Imran Ibn Husayn pé porte ki le Messager d’Allah (s.a.w) fine dire: “Mo fine trouve le paradis et mo fine trouve so bane habitants c’est bane pauvres et mo fine trouve l’enfer et mo fine trouve la plupart de so bane habitants c’est bane madames”. (Bukhari)

 

Dans Quran Allah pé dire dans Ch.44, V.57): “Zot pas pour bizin goute là-dans ene l’autre la mort ki premier là, et Li (Allah) pou protège zot contre punition grand difé là”.

 

Ene lotte place dans Quran Allah pé dire: “Mais bane ki gagne la foi et faire du bien, zot pou gagne jardins paradis pour rester. Zot pour reste là pour tout létemps, et zot pas pou rode change place.” (Ch.18, V.107-108)

 

Abu Huraira (r.a) pé raporté ki le Messager d’Allah (s.a.w) fine dire: “Celui ki rentre dans Paradis li être béni d’ene la vie joyeuse, jamais li pour miserable, so vêtements jamais pour usé et so jeunesse jamais pou fini”. (Muslim)

 

Bane compagnons du prophète (s.a.w) fine demande li concernant bane la caze dans paradis, et voici la réponse ki le prophète (s.a.w) fine donné.  “Avec bane briques en or et argent et parfum Musc, ti roche de perles et saphir et la terre de saffron. Celui ki rentre là-dans, li pour bien content et jamais li pour miserable et li pour reste là-dans tout létemps et jamais pour mort. Zot linge jamais pour usé et zot jeunesse jamais pour fini.”

 

sLe nombre la porte ki ena dans paradis c’est huit. Sahl Ibn Sad Al Saïdi (r.a) pé rapporté ki le Messager d’Allah (s.a.w) fine dire: “Paradis ena huit la porte, ene là-dans appelle Al-Rayyaan. Personne pas pou rentre là-dans excepté bane ki garde Roza et kan zot pour rentre là-dans, la porte là pour être ferme derrière zot et personne d’autre pas pour rentre làdans.”

 

Dans ene l’autre Hadith ki récité par Abu Huraira (r.a) le prophète Muhammad (s.a.w) fine dire: “Celui ki dépense ene parti de so richesses pour le plaisir d’Allah, li pour être appellé parmi bane la porte du paradis et paradis ena huit la portes. Celui ki faire Namaz (régulièrement et couma bizin) li pour être appellé dépi la porte Namaz. Celui ki donne la charité, li pour être appellé dépi la porte de la charité. Celui ki fine sorti pour la guerre (faire Jihaad), li pour être appellé par la porte de Jihaad et celui ki ena l’habitude garde Roza, li pour être appellé dépi la porte de Roza”. Abu Bakr (r.a) fine dire: “Par n’importe ki ene de ça bane la porte là. Mais O Messager d’Allah, estce ki ena kikaine pour être appellé par tout ça bane la portes là?” Li fine dire: “Oui, mo espéré ki to ava être ene parmi zot.”

 

Dans ene l’autre Hadith ki trouve dans Muslim, Umar Ibn Al-Khattab (r.a) pé dire ki le Messager d’Allah (s.a.w) fine dire: “Celui ki faire Wuzu et faire li bien et ensuite lève so regard vers le ciel et dire: “Ashhadu alla ilaaha ill-Allah wahdahuu laa sharika lah, wa ashhadu anna Muhammadan abduhuu wa rasuluuhu”, les huits la portes du paradis pour ouvert pour li et li pour rentre par n’importe ki ene de ça bane la portes ki li oulé”.

 

Place pli élévé dans paradis c’est “Al-Wasilah”. Ça place là Allah fine reserve pour le prophète Muhammad (s.a.w). Ça place là faire mention dans duah ki nous lire après Azaan.

 

Dans ene Hadith ki fine mentioné dans Ahmad, Abu Huraira (r.a) pé dire: “Bane Sahaba fine demande le prophète (s.a.w): “Ki été ‘Al-Wasilah’?” Li fine réponde: “C’est le niveau plus élévé du paradis ki seulement ene seul personne pour gagner et mo espéré ki li pou pour moi”.

 

Dans ene parti ene Hadith ki trouve dans Bukhari, récité par Abu Huraira (r.a) kot le prophète Muhammad (s.a.w) fine dire: “Paradis ena cent niveaux ki Allah fine reserve pour bane Mujahidiin ki fine la guerre pour So cause et distance entre les deux grades c’est comme distance entre léciel et la terre. Alors kan zot demande Allah quelque chose, demande Al-Firdaus ki le meilleur partie du paradis.”

 

Celui ki prend charge ene orphelin et occupe li alors li pour près avec le prophète Muhammad (s.a.w) dans paradis. D’après ene Hadith ki trouve dans Muslim, Abu Huraira (r.a) pé rapporté ki le prophète Muhammad (s.a.w) fine dire: “Celui ki prend en charge ene orphelins soit dépi so l’argent ou l’argent de l’orphelin là, moi avec li pour coumsa dans paradis.”

 

Pé expliquer, ki li pour avec le prophète (s.a.w) couma dire deux les doigts ki dans la main, zot bien près alors coumsa même pour près avec le prophète (s.a.w).

 

Ene zenfant pieux ki faire duah pour so parents ki fine mort, Allah pour élévé ça parents là so place dans paradis.

 

Dans ene Hadith kit trouve dans Ahmad, récité par Abu Huraira (r.a), le Messager d’Allah (s.a.w) fine dire: “Allah pour élévé rang de so bane serviteur dans paradis et pour dire Li (Allah): “O mo Rab, couma mo fine gagne ça? Li (Allah) pour dire: “Parce ki to zenfant fine demande pardon pour toi.”

 

Plusieurs places dans Quran Allah faire mention bane la rivière ki trouve dans Paradis.

 

“Et donne la nouvelle bane ki ena Imaan et bane ki faire bon travail ki pour zot ena bane jardins ki bane la rivière passer là-dans.” (Ch.2, V.26)

 

“Certes, bane ki croire et faire bane bon actions pour trouver ki Nous pas laisse perdi récompense de celui ki faire le bien. Pour ça bane là ena bane jardins d’Eden kot bane la rivières coulé.” (Ch.18: V.31 & 32)

 

Concernant bane la rivière, le prophète Muhammad (s.a.w) fine dire ki durant l’Isra: “Mo fine trouve quatre la rivières ki ti pé sorti enba sidrat-ul-muntaha; deux ti visibles et deux ti cachiette. Mo fine demandé: “O Jibreel, ki ça bane la rivières là?” Li fine dire: “Ça deux la rivière cachiette là c’est la rivière du paradis et deux la rivière ki visible là c’est la rivière Nile et Euphrates.”

 

Ene l’autre la rivière dans paradis ki faire mention dans Quran c’est Al-Kawthar.

 

“Certes (O Muhammad) Nous fine donne toi Al-Kawthar” (Ch.108, V.1)

 

Bane la rivières dans paradis contenir de l’eau, du lait, du vin et du mile. Mais zot pas pour pareil couma séki nous trouver et conner dans ça lémonde ici-bas là. Pour ena ene resemblance mais zot pour ene l’autre.

 

Voici description Paradis ki fine promette à bane pieux: Pou ena bane la rivière ki so de l’eau pas donne mauvais l’odeur et bane la rivière du lait ki so gout jamais changer, bane la rivière du vin, agréable à boire et bane la rivière du mile purifié. (Ref: Ch.47, V.16)

 

Dans paradis ena beaucoup la source ki donne different gout. Allah pé faire nous conne ça vérité dans Quran là: “Certes bane pieux zot pour dans bane jardins kot ena bane la sources”. (Ch.15, V.45)

 

“Bane pieux pour parmi bane l’ombrage et bane la source”. (Ch.77 V.42)

 

Dans paradis ena ene la source de Kafur (camphre) – pas ça camphre ki nous conné là mais ene lotte – kot bane Abrar (pieux) pour boire dépi là-dans.

 

“Bane vertueux pour boire dépi ene coupe ki so mélange pour être de camphre. Ene la source kot bane serviteurs Allah pour boire et zot pour utilize li à zot convenance (Ch.76, V. 5&6).

 

Insha-Allah, mo pour continié cause lors le sujet du paradis la semaine prochaine parce ki nous pas pour capave fini cause le paradis tellement ena kitchoses pour dire à so sujet. Insha-Allah.