Text Box: Bismillah-ir-Rahman-ir-Rahim Khutba Jummah de Hazrat Amir’ul Momeneen Muhyi-ud-Din Vendredi 25 Novembre 2005 AL ZILZAAL (La Sécousse) (Ch.99) Après ki Hazrat Amirul Momeneen Muhyiuddin, Munir Ahmad Azim finne lire le Tashahhud , li finne lire sourate Al Fatiha du Saint Coran suivi de sourate Al Zilzaal(ch99) et li finne donne so traduction comme suit : Au nom d’Allah, le Gracieux Le Miséricordieux Quand la terre pou sécoué are so violent tremblement Et ki la terre pou jette dehors so banne fardeaux Et ki l’homme pou dire : « Bé ki li gagné ? » Ça jour la , la terre pou raconte so banne nouvelles ; Parski So Seigneur finne déjà révèle li ça Ça jour là banne dimounes pou avancé par groupes séparé pour ki nous montré zotte resultats zotte banne actions Alors dimoune ki faire ène bien, poids ène atome li pou trouve li Alors dimoune ki faire ène mal , poids ène atome li pou trouve li Ensuite li finne dire : Ça Surah là pé explique lors secousse terrible qui pou produire quand lé monde, couma nous conne li azordi, pour disparaîte complètement et pour faire place à ène nouveau monde spirituel kot pour éna la Justice et la Vérité. Symbole qui fine servi pour faire nous comprends ki pour passé, c’est ene tremblement de terre qui pou sakouye tous bane fondations de nous lémonde actuel. (Ene lémonde ki zis matériel et temporaire). Bane paraboles ki décrire ça tremblement de terre là zotte remarquable ki li soit par zot la force ou par zot utilisation approprié et extraordinaire. Par ça tremblement là, tous bane mystères ki ti cachiétte avant, tous ça bane mystères là pour exposé devant zot tous. Quand l’heure du Jugement pour arrivé, pour éna ene secousse bien fort. La terre pour vomi tous so bane secrets et li pour raconte so z’histoire. L’humanité en entier pour rassembler et so bane actions pour dévoiler et Allah, le Créateur pour prends compte tous ça bane actions là dans les moindres détails, qui li ene bon action ou ene mauvais action ; Allah au courant de tous kitchoses. Dans ça verset ki mo fine lire là kot Allah (swt) pé dire : V.1. « Quand la terre pou sécoué are so violent tremblement» Pour ene dimoune ordinaire ki pé témoigne ene tremblement de terre, ça tremblement là li arrivé sans prévenir. Li vine télment vite et so source li reste sans ene explication détaillé et sans bazé lors ene confiance de sureté lors so origine. Quand li vini, li éna la capacité pour détruire tous lors so passage. Même bane kitchoses ki l’homme de par so ignorance pensé solide, ça tremblement de terre là quand li vini, li mette l’homme au défi et li détruire tous séki l’homme fine construire. Alors nous capave imaginer impé (couma ça pou été). Et Allah de par So Toute Puissance fine réserve ça connaissance là, mais aussi Allah fine donne nous ene l’idée couma ça tremblement de terre ki pour manifester le Jour du Jugement là pour été, kot Allah même dire ki li pour télment immense (extra grand et puissant) et ki jamais l’homme fine déjà témoigner avant. Sa capave donne nous ene l’idée couma lémonde en entier pou sakouyé ça jour terrible là. V.2. « Et ki la terre pou jette dehors so banne fardeaux» Ene tremblement de terre quand li accompagné d’ène éruption volcanique, li faire tous bane sortes qualité grosseur roches ek lave sorti dépi profondeur la terre et li projette tous ça là dans l’air. Zotte projetté dans l’air comme ci dirai zot bane fardeaux de la terre. Sa bane fardeaux là pour ça lémonde ici-bas là, li capave ene forme de bane minérales ou bane trésor cachiétte dans profondeur la terre afin de préserver zot secret. Sa même éruption là dans la vie de l’homme, pour arrivé ene jour kot bane morts ki fine enterré et oubliés zot pou léver, et bane z’affaires ki l’homme ki pé faire secrètement, Allah pour dévoile tous ça là. La lumière de la Vérité pour briller et la Justice pour faire sous toute so forme. Pour nous bien comprends ça explication là, nous guette Allah même ki fine dire dans le Quran ‘Surah Ibrahim’ : « Wa maa yakhfaa alallaahi min shay-in fil arzi wal laa fis-samaaa » (Mais pas éna aucaine quique chose qui cassiétte d’Allah lors la terre et au ciel) Et Allah dire, Li pé seulement renvoye zot pour ça jour quand tous lizié pour gagne ène regard fixe droite devant zotte et zotte lécoeur vide couma l’air. Allah li envoye so bane messagers pour donne bonne nouvelle et aussi pour averti dimoune ki ene jour punition pour vine lors zotte et bane ki fine faire du tort ou zot fine rejette les signes d’Allah, quand zotte pour trouve ça punition là pé vine lors zot, à ce moment là zot pour dire : « O nous Maître, donne nous ene délai pour ene ti période encore. Nous va répondre To l’appel et nous pour suivre To bane Messagers ». Allah pour dire zot : « Eski ou pas ti faire serment avant ça, qui jamais pas pou capave déplace ou ? » et Allah pour dire zot : « Zot pas ti dire : ‘Necque éna ça la vie lors la terre là. Nous pas pou relever encore ; nous péna aukaine compte pour render’ » ? Allah dire : «  si to ti capave trouve zot, quand zot pour diboute divant zot Maître ». Et Allah demande zot : « Eski c’est pas ça la vérité ? ». Lérla zot pou dire : « Mais oui, et nous faire serment lors nous Maître ». Alors Allah pour dire zot : « Goûte ou punition, parski ou ti rejette la foi ». Allah dire : " Zot faire la perte, bane qui refuse accepter qui zot pour joindre Allah ene jour, zotte fine prends la vie lors la terre seulement en ene badinage et ene l’amusement. Et quand tout d’un coup, l’heure là arriver lors zot, zot pour dire : Nous bien chagrin qui nous pas ti prends ça compte. Allah pou dire, zot charier zot fardeau lors zot lédos, et qui mauvais fardeau ça pour été. Quand Nous fine avoye Nous signes, Nous avertissements à travers nous bane messagers, zot fine ridiculise Mo bane Messagers et fine traître zot de toutes sortes qualités blâmes ; Alors Allah pou dire zot : C’est pas Mo bane messagers ki zot ti pé ridiculizé, zot ti pé mette bane blâmes ; c’est Moi ki zot ti pé ridiculisé et c’est signes Allah qui bane mauvais dimounes refuse accepter. « Fa-innahum laa yukazzi buunaka wa laa kinnazzaalimiina bi Aayaa-tillahi yajhaduun. Afalaa ta’qiluun ? ». Eski ou péna l’intélligence ? Sa moment là, dimounes pou tracasser et pour demander ki pé passer et ki faire la terre pé tremblé. D’ordinaire quand ene tremblement de terre sakouye ene place lors la terre, l’homme gagne peur et pas gagne létemps prends so précaution et c’est dans ça moment de frayeur et de panique ki li conne so Seigneur. Sa jour terrible là pour vini et couma Allah même dire dans Qu’ran : « Falaa tahsa bannallaaha mukhlifa wadihii rusulah :Innallaaha Aziizun Zunti qaam » (Faudé pas qui to penser qui Allah pour manque à So l’engagement envers So bane Messagers. Allah grand et punition dans So la main). Bane dimoune pas zis pou trembler de frayeur mais zot pour distribuer mais zot pour absolument terrifié kot le moment tant attendu de la part d’Allah pour arriver kot Allah pour distribuer So bane faveurs aussi et So bane punitions équitables pour banes dimounes ki mérité. Sa souffrance ki l’homme pour éna ça jour là pas pou pareil avec bane tremblement de terre ordinaire qui la theterre habitué témoigner. Couma Allah même dire dans Quran : « Yawma tubaddalul Arzu gayral Arzi was samaawaatu wa barazuu lillaa hil waahidil Qahhaar » (Le jour quand la terre pour transformer en ene l’autre la terre, et bane léciel aussi, et dimoune pour paraître devant Allah, l’Unique, Le plus fort qui tout). Et nous capave comprends couma ça tremblement de terre spéciale là pou catastrophique kot l’homme même pas pour gagne létemps même prié so Seigneur pour pardonne li so bane péchés et ça tremblement de terre là pas pou sapé avec ça, parski l’homme fine complètement oublier so Seigneur et ça moment là, la colère d’Allah pour manifester pleinement et Allah dire : « Wa taral mujrimiina yawma izim muqarraniina fil asfaad » - To pou trouve ça jour là bane ki fine faire péché attacher ensam avec la chaine, deux par deux » - et zot pou envelopper avec goudron et difé pour couvert zotte figure. « Et ki l’homme pou dire : « Bé ki li gagné ?  Ça jour la , la terre pou raconte so banne nouvelles ; » Ici nu capave personnifié l’état de bane choses pareil couma nu fine personnifié la terre. L’état actuel de bane choses pou disparaîte mais tous bane actions ki l’homme fine faire ki li ouvert ou cassiette, tous ça là pour sorti et pour témoigner en faveur de ça dimoune là ou contre li ; en plein jour d’après l’ordre ou la parole d’Allah, qui Li Tousél capave déclenche ene tel l’évènement. Et ça moment là, la terre ki fine personnifiée ici, li pour dévoile tous so bane secrets kot li pou raconte tous kitchoses ki li conné ; tous bane secrets qui li fine garde en li. Et c’est avec la permission d’Allah ki li pour faire ça. Prochain versets toujours de surah ‘Zilzaal’ Ch.99 V.6-8, : Parski So Seigneur finne déjà révèle li ça Ça jour là banne dimounes pou avancé par groupes séparé pour ki nous montré zotte resultats zotte banne actions Alors dimoune ki faire ène bien, poids ène atome li pou trouve li Alors dimoune ki faire ène mal , poids ène atome li pou trouve li Dans ça lémonde ici-bas là, tous bane bon et mauvais zot mé langer. Mais quand ça grand jour terrible là pour vini, zot pour séparé ene de l’autre et en plusse de ça le bien et le mal pour divisé et classer d’après zot grade ki zot éna. Alors, c’est dans ça façon là ki zot pour défilé pour alle passe zotte jugement devant zot Créateur, et à ça moment là, pour faire zot trouve consékances réelles de tous sàki zot fine déjà pensé, faire ou dire, lors ça la terre ki rempli d’épreuves. Et Allah pour montrer zot tous sàki zot ti pensé et ki zot fine bien cassiette et Li pou mette tous ça là devant zot. Quand pou balance compte, tous tipti détails pou prends compte afin pour gagne ene jugement juste parski Allah, Al-‘Adl, Li ene Dieu Juste et Équitable et jamais Li pou récompense ou puni ene dimoune tanque ki dimoune là pas fine faire ça action là. Tous bane actions ki ça dimoune là fine faire, li pou récompense li et li pou puni li d’après tous tipti mauvais action ki li fine faire. Couma Allah même dire dans Quran :- « Liyajzi yallaahu kulla nafsim maa kasabat ; innallaaha sarii-ul-Hisaab » (Ch.14, V.51). (Comme ça Allah pour donne comme récompense à chaque nâme ce qui li mériter. Allah surement vif pour faire compte ». Et ça verset là faire nous comprend ki même so action (ki bon ou mauvais) li le poids d’ene atome, et Allah pour faire li sorti et si Allah envie pardonne ça dimoune là pour so mauvais action, à ce moment là, assurément Allah Li le Très-Pardonnant, Le Très-Misécordieux. Allah puni séki Li envie et Li augmente faveur, grâce et grade ki Li envie. Assurément tout pouvoir trouve dans So la main ; Et tous dimoune pour trouve tous sàki zot ti faire présente devant zot et celui à ki so livre, ene livre de la droiture vine dans so la main droite ; Alors ça dimoune là pas pou éna aukaine tracas pour prend ça, mais celui ki recevoir so livre , le livre de la tourmente dans so la main, assurément li ti pou souhaiter ki jamais li pas recevoir so livre parski li pour conter ki jamais li pas recevoir so livre parski li pour conner ki consékances de so bane actions, li bien grave et de ce fait li pou déshonnorer de parmi tous bane dimounes ki la terre ene jour fine déjà contenir. La promesse d’Allah li assurément vrai et zot pour trouve ça promesse là réalizer sous tous les formes sakaine dans so façon. Allah fine faire ça promesse là dans Quran pour bane dimounes ki fine amène Imaan (la foi), ki zot récompense pas pou perdi dutout. Allah dire : (Bane ki gagne la foi et faire du bien…Nous pas laisse perdi récompense dimoune qui so action bon). Allah continuer dire dans Quran pour bane croyants : « Gagne patience dans compagnie bane qui prier zot Maître matin et soir et qui cherche So présence. Pas laisse to lizié abandonne zot, et pas cherche bane attractions ça la vie lors la terre là. Et Allah dire : «  Pas obéir dimoune qui Nous fine laisse so lécoeur oublier pense Nous, et qui suive so propre désir et qui tout so la vie ti ène gaspillage » (Surah Al-Kahf (18) V.29) Allah dire laisse bane ki fine rejette la foi et ki fine faire du tort, Mo fine prépare pour ça bane là ene difé qui so parois pour entoure zot. « Wa Saaa’at murta faqaa » (Et qui mauvais place pour reposer) Qui Allah aide chacaine parmi nous pour comprends ça bien et pardonne nous nous bane péchés et mette nous sur le droit chemin. Ameen.