Text Box: بسم الله الرحمن الرحيم Khutba Eid HAZRAT AMIR’UL MOMENEEN MUHYI-UD-DIN AL KHALIFATULLAH Munir Ahmad Azim 21 Septembre 2009 EID MUBARAK (Résumé du Khutba d’Eid) Après ki le Khalifatullah fine saluer zot tous, li fine commence lire le Tashahhud, Taouz et Surah Al Fatiha et ensuite li fine lire ça verset Quran suivant là: Ena beaucoup leçons ki nous capave tiré dépi célébration Eid-ul-Fitr. Celui ki témoigne bane signes d’Allah sans ki li tire bane leçons, li pas vaut nennié. Le croyant li, li bizin tire ene leçon de saque kitchoses. Mo pou attire zot l’attention lors bane avertissements ki Eid-ul-Fitr renfermé. Si ou tire profit de ça, alors ou trouve en rézulta ene changement extraordinaire et ou goûte à ce moment là le plaisir du vrai Eid-ul-Fitr. Eski dans ene famille kot fine ena ene « Mayatte » (la mort), pou fête Eid ? Ene madame ki ena divant li cadavre so mari ; même si présente li tous bane plaisirs de ça le monde là, ou pas pou capave arrête so bane larmes. Pou ça dimoune ki so lékaire rempli avec chagrin là, pou li péna aucaine contentement. Eid veut dire contentement dans lékaire, et celui ki péna aukaine contentement dans so lékaire, li péna aukaine Eid. Astère mo pou demande ou, ki gaie aujourd’hui, et ki dire ki aujourd’hui c’est « Eid-ul-Fitr », eski ena ene différence entre hier et aujourd’hui ? Eski li ene jour de contentement parski certains d’entre nous ine mette bane zoli linze ou sois fine prépare bane bons manzé ? Si c’est pour ça ki aujourd’hui li ene zour de contentement, eski nous pas ti capave fer même zaffaire hier ? Eski zot conne la raison de zot contentement aujourd’hui ? C’est parski Allah ti impose lors ou ene charge et ou fine accompli li bien. Donc, Eid-ul-Fitr li vine ene jour de contentement, oui, mais seulement pou bane ki fine obéir tous bane commandements d’Allah. Li ti demande ou pou pas manze nennié entre bane l’heure spécifiques et pou éloigne ou de tous bane relations sexuelles pendant ki ou pé garde roza. Allah ti oulé ki ou implore Li et ki ou fer beaucoup So Ibaadat (adoration). Pour celui ki pas fine accompli ça bane demandes là, pou ki raison eski li content azordi ? Li ene signe de folie pou démontré contentement sans raison. Ene étudiant ki pas fine apprane nennié li pas pou content kan l’examen vini. Zis ça étudiant ki fine bien apprane là ki pou content parski li conné ki kan li pou passé, ça pou ene succès pou li. Eid-ul-Fitr li ene jour de fête pou celui ki fine suive bane commandements d’Allah. Mais c’est ene deuil (tristesse) pou tous bane ki fine oublié ça bane commandements là parski aujourd’hui li le jour de jugement et bane dimounes fine réunit. Saque dimoune so l’état et so bane linze li ene preuve ki li là pou présente so compte. Pour celui ki pas fine fer nennié, pou li c’est ene jour de tristesse. Comprends, ki Eid li ene moyen d’élévation spirituelle pou bane ki pas ti pé gagne l’habitude fer Tahajjud toute au long de l’année et ki fine gagne l’occasion fer li dans Ramzane. Et en même temps li ene témoignaze pou ça bane dimounes là ki zot ena la capacité pou fer li continuellement. Bane ki plaigné ki zot pas capave lévé pou Tahajjud, ça bane là coupable aux yeux d’Allah. C’est pour ça ki mo fine dire ki Ramzane et Eid-ul-Fitr zot fer nous tire bane leçons. Généralement bane dimounes dormi plisse pendant la nuit de Eid alors ki zot ti bizin fer le contraire parski Tahajjud li ene de bane meilleurs façons pou gagne le rapprochement d’Allah. C’est pour ça raison là ki le Saint Prophète (saw) ine dire à propos d’ene de so bane compagnons, ki li ti bien respectable, mais ki li bizin observe le Tahajjud. Garde alors ça l’habitude ki ou fine gagné pendant Ramzane et pas casse li. Le Tahajjud li ene de bane faveurs d’Allah et le Quran ine mentionne ça kan li dire : « En vérité, kan ou lévé la nuite (pou prié), li ene moyen pli efficace pou maîtrize ou-même et atteindre la connaissance de ça bane paroles ki ou servi pou prié là (c’est-à-dire, bane duahs ki ou invoqué avec Allah). » C’est dans l’homme so nature pou content bane zoli kitchoses. Si ou alle dans ene la forêt ou pou naturellement attiré par bane fleurs. Mais ki fer ou pas galoupé vers le Jardon d’Allah kot ena kantité de bane fleurs pou ou progrès spirituel ? Ene lotte leçon ki nous capave tiré dépi le mois de Ramzane, c’est ki bane même dimounes ki ti toujours peur bane difficultés, pendant Ramzane zot fine apprane supporte la faim et la soif et bane lézot difficultés. Zot fine réussi lévé pendant bane la nuite courtes en été, séki prouvé ki zot capave aussi lévé pendant la nuit dans l’hiver et supporte bane lézot difficultés. Leçon là c’est ki ou bizin montré plisse détermination pou servir l’Islam et ki zot pas bizin gagne peur de tout bane difficultés ki capave présente devant ou. Ena ene grand différence entre, kan détermination li présent et kan li absent. Pendant Ramzane ou fine mette dans ou l’esprit ki ou pou bizin supporte la faim et la soif pendant 14 heures temps ou plisse, et c’est pou ça raison là ki ou fine réussi fer li. Mais bane lézot zours kan l’intention li absent, li difficile pou supporte la faim même si li pou 2 heures seulement. Avec l’intention, nous capave accomplir bane grand travails. Alors faire ene l’intention ferme ki à partir d’aujourd’hui ou pas pou négligeants concernant ou bane devoirs envers la religion d’Allah. Et pas considère bane zaffaire de la religion couma ene fardeau. Si ene dimoune dire à ene mama ki inquiet au sujet du bien-être de so zenfant et ki reste lévé pendant toute la nuit pou okipe zenfant là, si ça dimoune là ire li alle dormi, pas fatigue li, ça madame là en aukaine façon pas pou apprécié bane conseils de ça dimoune là. Ça li pareil pou ça étudiant ki prend goût pou reste lévé à soir pou étudié et ki pas prend ça couma ene fardeau, parski li conné ki valaire so l’étude ena. De ça même façon là, bane difficultés ki nous gagné en servant la religion d’Allah, zot pas vine couma bane difficultés. Si ou accompli ou promesse ki ou fine fer dans la main du Khalifatullah Muhyi-ud-Din, ki ou pou donne préférence à la religion ki ça le monde là et ki ou pas pou tourne ou le dos avec bane difficultés, alors ça pou vraiment ene bonne nouvelle ; et pas pou existé ene pli grand grâce ki ça. Ça promesse là li inclure ki ou pou supporte avec joie bane difficultés ki ou pou gagné zis pour le but pou gagne Allah. Couma li possible ki ene mama li prêt pou passe ene la nuite sans dormi zis pou bien-être so zenfant ou ki ene étudiant accepté sacrifié so sommeil pou so bane l’étude ; alors ki ou, pou gagne la main d’Allah, ou pas capave supporte bane difficultés ? Alors ki ça bane soi-disant difficultés là li ene nennié ditout parski rézilta là li pou en forme d’ene la paix et ene bien-être éternel. Ou bizin rende ou bien compte ki bane difficultés ki ou gagné dans le chemin d’Allah, c’est ene Grand Faveur. Si ou reste faim pou la cause d’Allah, ça li pli bon ki tout bane bons manzé ki éna. Celui ki li nu pou la cause d’Allah, Allah pou habille li (C’est-à-dire, celui ki fine gagne humilié pour la cause d’Allah, Allah pou honore li). Aukaine l’amour, absolument rien pas capave rivalizé avec l’amour d’Allah. Celui ki quitte so bane bien-aimés pour Allah, Allah pou donne li bane lézot ki pou content li plisse encore. Celui ki, pour la cause d’Allah abandonne so famille, la caze, pays et bane kitchoses de ça le monde là, Allah pas pou laisse so bane actions alle dans vide. Mais au contraire, tout séki li sacrifié li couma ene la grain ki Allah fer multipliyé. Bane compagnons du Saint Prophète (saw) fine fer bane sacrifices pou la cause d’Allah. Mais comparé à bane récompenses ki zot fine gagné là, ça bane sacrifices là li ene nennié di tout. Zot fine quitte zot pays à cause bane incroyants fine expulsé zot mais zot ti retourné en tant ki bane maîtres. Eski zot sacrifices fine alle dans vide ? Anecdote : Ene fois Hazrat Abu Huraira (ra), ene compagnon du Saint Prophète (saw) ti pé marche dans ene l’endroit et li ti ena avec li ene mouchoir royale ki ti appartenir à Chosroes, le roi de la Perse. Saque fois ki li ti pé moussé, li ti pé fer li dans ça mouchoir là. Bane dimounes ti pé reste bête pou trouve ene dimoune aussi simple avec ene tel objet royale. Li dire zot : « Mo fine touzours reste dans Masjid du Saint Prophète (saw) pou ki mo pas perdi ene sel de so bane paroles. Plizirs fois, dans ça l’état là, mo ti pé gagne tellement faim ki aukaine parole pas ti pé sorti dépi dans mo la bouche. Ti ena bane zours kot mo ti pé reste faim pour 7 ou 8 heures temps. Ene zour, mo ti pé gagne tellement faim ki kan Hazrat Umar ti pé passé, mo ti pé demande li pou explik moi ene verset ki koze lors la charité. Li fine donne moi so explication et après li fine allé. Hazrat Abu Bakr, ki ti ena l’habitude fer beaucoup charité ine vini aussi et mo fine pose li même question ki mo ti demande Hazrat Umar et li fine réponne moi. Moi mo ti conne l’explication là très bien mais mo l’intention ti pou attire zot regard lors mo condition et pou ki zot donne moi kitchose pou manzé. Le Saint Prophète (saw), ki li, li fine comprends tout, ine sorti après et li fine dire moi pou amène bane lézot pauvres kot li avec moi. Nous ti à 7 et ti ena kot li ene bol di lait et li fine dire moi fer tous bane lézot dimounes là boire avant. Moi mo ti gagne peur ki tout di lait là fini et ki pas reste nennié pou moi. Mais malgré ki zot tous fine boire, bol là ti touzours rempli ziska là-haut. Après, le Saint Prophète (saw) fine donne moi bol là et mo fine boire ziska ki mo ventre fine rempli. Le Saint Prophète (saw) ine dire moi pou boire encore et mo fine boire ziska ki mo ti gagne l’impression ki di lait là ti pé sorti dépi par mo bane z’ongles. Ti ena bane moments, kot mo ti pé gagne tellement faim ki mo ti pé tombe sans con naissance et bane dimounes, ki ti pé croire ki mo ti pé gagne crize épilepsie, ti pé donne moi coute souliers pou ki mo reprend connaissance. Zot pas ti conné ki mo ti tombé à cause mo faim. A là li-là couma mo l’état ti été avant et astère là mo pé mousse mo néné dans mouchoir royale de Chosroes (le roi de Perse) ki ti le maître de la moitié du monde. » Kan nous fer ene bon action, ça action là li en li-même ene satisfaction. Celui ki fine sauve ene kikaine ki ti pé noyé li pli satisafait ki ene le roi ki fine conquérir ene pays. En aidant ene dimoune abandonné, ça li ene action très noble et li amène beaucoup contentement et le plus abandonné de tous bane dimounes c’est celui ki loin avec Allah. Situation ene kikaine ki reste faim li meilleur ki situation ene le roi ki possède extra beaucoup richesses mais ki loin avec Allah. Pas tourne ou vers bane plaisirs de ça le monde là parski zot pas réelle. Bane di biens et bane conforts de bane dimounes possédé lors ça la terre là li nennié di tout kan zot péna aukaine relation avec Allah. Ou, ou bien fortuné parski ou ena ene lien d’amitié avec Allah. Aujourd’hui c’est Eid et ou fine fer bane charités d’après ou moyens. Mais aujourd’hui ene grande partie de ça le monde là pé fête Eid zis couma ene façade (ene illusion) mais ena zis tristesse et désolation dans zot la caze. Zot fine éloigné avec Allah et Allah fine éloigné avec zot. Zot fine quitte l’ensemble de la grâce d’Allah et zot fine détruire zot-même. Ou, ou la main li dans la main d’Allah. C’est pou ça raison là ki à parte ou, péna aukaine Eid pou personne. Bane ki fine vive l’époque d’ene envoyé d’Allah et ki fine accepté li, pou zot li permette ki zot heureux. Beaucoup ine attane ça l’époque là sans ki zot fine trouve ça messager là. Ça l’époque là ti prophétizé par bane prophètes ki fine vini dans le passé ; ou, ou fine accepté ça messager ki fine vini là, alors pou ou li permette ki ou montré ou contentement. Après mo pou demande ou pou tourne vers bane ki zot fine totalement éloigné d’Allah ; bane ki fine prend ene serviteur d’Allah couma bondié tandis ki ça même serviteur là pas ti pli supérieur ki Moussa (as) ou bien même Hazrat Mohammad (saw). Alors ! Ki Eid ena pou ça bane dimounes ki fine quitte le vrai Dieu et ki fine fer d’ene simple dimoune ene bondié ? Eski ena Eid pou bane dimoune à propos de ki Allah fine dire ki zamais aukaine peuple avant pas ti goûte à So punition ? Nous bizin compatissant envers zot, même si zot paraite gaie et ki zot vivre parmi bane richesses parski dans ou lizié ça bane là zot bane cadavres. Zot mérite nous compassion et c’est nous devoir pou ramène zot vers Allah. Bane ki déclare zot-même musulmans Ahmadi et ki pé fête Eid en même temps ki nous, zot aussi zot mérite nous compassion parski zot fine rejette la manifestation et révélation ki vine de côté d’Allah et ki prend zot-même pou bane défenseurs du Nizamé Jamaat. Le Messie Promis ti écrire plusieurs livres pou fer dimounes comprend la révélation et bane là à zot tour ine prend plisse ki ene siècle pou fer bane lézot dimounes comprend ki Allah encore cozé. Mais aujourd’hui c’est ça bane là même ki fine rejette la manifestation d’Allah. Alors ki Eid ki capave ena pou ça bane ki fine refuse écoute le signe ou le message d’Allah ? Ena beaucoup de paresse. Astère ene l’heure pou nous tous, grands et petit, ignorants ou savants pou nous déboute ensam pou servir la foi. Ça pas appelle ignorance si ene kikaine pas conne ni lire ni écrire. Li bizin penser ki le Saint Prophète (saw) li-même li pas ti conne ni lire ni écrire. L’ignorant li celui ki péna aukaine connaissance divine en li. Le Messie Promis ine dire ki l’homme li pas vive seulement avec di pain. Mais c’est la parole divine ki garde li en vie. Alors alle rode la connaissance divine. Allah ine fine offert ou comme trésor, ene la force et ene z’arme. Si ou pas servi zot, alors ou la force pou gaspillé et ou z’arme pou vine inutile. Servi ça la force spirituelle ki ou fine gagné là dans le chemin d’Allah. Sinon ou pou perdi li couma ou perdi ene membre de ou lécorps kan ou pas servi li. Prend courage et transmette le message d’Allah dans tous bane l’endroits du monde. Pas gagne honté de bane sacrifices ki ou bizin fer dans ça chemin là. Mette ou diboute avec ene seule objectif pou fer le monde conne bane trésors de la connaissance divine. Fine mentionné dans bane hadiths ki le Messie pou distribué bane trésors mais ki bane dimounes pou refuse prend ça. Le Messager du siècle passé et aussi celui de nous l’époque aussi ine ouvert bane trésors du Quran Shareef, alors laisse nous répanne ça bane trésors là au monde entier. Aujourd’hui ena bane ordinateurs pou ki nous capave touche zot tous, ki li riche ou pauvre. Aukaine contentement li pas parfait tanque ki nous pas partage li avec nous bane frères. Tous bane dimounes lors la terre, ki li Juifs ou Chrétiens ou Hindous zot nous bane frères parski nous tous vine dépi bane zenfants d’Adam. Alors couma eski li possible ki nous zoine Allah et nous négligeants envers zot ? Ça c’est bane conseils ki mo pé donne zot et mo prié ki Allah donne nous la grâce pou fer le monde prend conscience de ça bane trésors ki Li fine donne nous là. Tous ça bane capacités ki ou ena là, servi zot. Pas reste sans rien fer tanque ki la religion d’Allah pas fine alle dans tous coins le monde. Zamais ou responsabilité pou fini tanque ki ou pas fer le monde conne Allah tousel et admette li en (Allah) So Présence. Anecdote : Mo envie raconte zot ene anecdote ki mo fine déjà tendé dans ene discours du 2ème Calife. Ene fois, ti ena la guerre entre la Grèce et la Turquie. Bane Grecs ti ena ene forteresse puissant, ki ti lors ene montagne. Bane Grecs là ti pensé ki zot forteresse pou tini pendant longtemps et ki bane Turques pas pou capave attaque li. Ti ena ene commandant turc, ki ti ena ene sense de responsabilité et l’honneur pou so pays. Ça commandant là fine réuni so bane troupes ki ti en minorité et li fine adresse zot ene discours. Dans ça discours là, li fine condamne le manque de courage et la peur. Li fine aussi fer bane là comprend ki li mieux pou mort avec l’honneur et gagne popularité au lieu ki vive dans la peur et pas gagne aukaine popularité. Après ça discours là, bane là ine mette tous zot la force pou attaque ça forteresse là. Zot ti pli dans ene mauvais position ki bane Grecs parski zot ti bizin grimpe montagne là pou arrive kot forteresse là. Zot fine continié attaqué mais sans succès. A la fin, général là ine gagne ene coute balle et so bane soldats fine bizin tire li dans champs de bataille là pou ki zot capave soigne li. Bane Grecs ti bien content parski zot ti pé pensé ki l’heure la victoire ti près pou zot. Mais tout le contraire fine arriver. Bane officiers ki ti pé travail sous l’ordre général là ine vine entoure zot bien-aimé général pou ki zot capave okipe so bane blessures. Mais général là ine dire zot : « Pas tousse moi. Si vraiment zot content moi et ki zot envie montré moi commié zot content moi, zot nék bizin alle fouille mo tombe là-haut dans ça forteresse là. Si zot pas capave fer ça, alors laisse mo cadavre ici-même kot ena bane corbeaux et bane li chiens. » Ça bane paroles là ine extra fer l’effet lors bane soldats là et zot fine alle attaque forteresse là avec ene telle la force ki li fine tombé sous zot la mains. Ena ene lotte anecdote ki rapporté ki ene fois ene l’aigle ti enlève ene zenfant et ti mette li dans so nid là-haut ene montagne. Mama là fine suive l’aigle là là-haut montagne ziska ki li fine regagne so zenfant et c’est après ki li fine réalizé kot li été et li ti pé gagne difficultés pou dessane. C’est après ki li fine gagne beacoup renfots ki mama et zenfant ine réussi dessane. Bane dimoune ki ti vine aide li fine demande li : « Mo pas conné. C’est ki mo nék conné c’est ki l’aigle là ti enlève mo zenfant et ki li ti amène li là-haut. » Ça madame ine riské so propre la vie pou alle sauve so zenfant, ene zaffaire ki même bane z’hommes pas pou capave fer. Alors dire moi, eski ou pas bizin servi à tout prix la religion d’Allah, couma ça madame là ine sacrifié so la vie pou so zenfant ou pareil couma ça général là, ki fine donne courage à so bane l’armée pou réussi sorti victorieux ? Eski zot pas trouvé ki le corps béni du Saint Prophète (saw) ine bléssé de partout par bane blâmes et bane critiques ? Eski zot pas trouvé ki zis l’Islam so nom ine resté et ki ça même Islam là li pareil couma ene lécorps sans la vie. Eski zot capave supporte trouve Allah, le Saint Prophète (saw) et l’Islam sali par ça bane critiques malpropres là ? Et ou fine vine assize là sans rien faire. Eski c’est pas ou-même le vrai serviteur d’Allah, de l’Islam et du Saint Prophète (saw) ? Dirize le monde dans ça direction kot bane dimounes capave reconnaite la grandeur d’Allah, l’Islam et Hazrat Mohammad (saw). Mo Allah Li Parfait. Mais doucement doucement bane dimounes ine commence attache bane défauts avec mo Rab (Maître). Alors éloigne ça bane mauvais conceptions ki ça bane dimounes là ena lors mo Rab. Et mette dans ou la tête ki ou pou alle fer le monde réuni sous ene sel religion. Et sauve bane pauvres et bane dimounes ki dans le besoin et sacrifié tout nous bane conforts et plaisirs dans le chemin d’Allah. Ki Allah donne nous l’occasion pou fer tous ça là (dans So chemin). Avant aussi, mo ti dire ki pou nous bane duahs exaucé ena détrois conditions ki nous bizin respecté mais l’important c’est ki nou bizin fer louanges d’Allah, récite Surah Al-Fatiha et Darood Shariff. Après fer ene ferme l’intention ki Allah pou exauce nous bane supplications et ki Allah pou donne nous l’occasion pou servi le Oummat de Hazrat Mohammad (saw) dans ene meilleur façon et fer le monde conne vrai l’enseignement de l’Islam. C’est à ce moment là ki nous pou fer vraiment ene véritable Eid-ul-Fitr. Insha-Allah.