Text Box:  DISCOURS JALSA SALANA 2012 Discours lors Da’wah & l’Institution d’ene Da’wah Academy  Hazrat Khalifatullah Hazrat Munir A. Azim (atba) (Dimanche 07 Octobre 2012 ~ 20 Dhul-Qaddah 1433 Hijri) Après Salaam, Hazrat Khalifatullah (atba) fine lire le Tashahhud, Ta’uz, Surah Al-Fatiha, et ensuite fine dire: Alhamdulillah, Summa Alhamdulillah, Mo pou aujourd’hui cause lors l’importance Da’wah dans nous la vie. Ki Allah donne zot le Tawfiq pou écoute attentivement à sa discours là et pou note bane points ki pas trop clair pou zot, et Insha-Allah, après mo disours, zot capave pose moi questions lors partie ki zot pas fine comprend. Da’wah in Historical Perspective … Alors, Da’wah à la lumière du Quran Shareef, li essentiellement paraite comme ene procès éducationelle, ene procès kot tous les temps ena ene enrichissement de connaissance, de piété et de savoir-vivre. Da’wah fine être mentionner comme le but et la mission de tous bane messagers d’Allah (ki la paix et bane benedictions d’Allah lors zot tous): « Nous envoye messagers pou donne bon nouvelle et aussi pou averti dimoune. Bane ki gagne la foi et faire le bien, pas pou gagne ni la peur ni chagrin. » (6: 49) En tant ki bane Du’at (Pluriel de Da’iyyah), zot fine gagne sa grand responsabilité pou appelle dimoune lors le droit chemin et vers la vérité. Pareillement tous bane messagers d’Allah fine invite tous dimounes vers la croyance pou accepter seulement ene sel Allah comme Dieu parski seulement Li (Allah) ki Dieu. Avant sa, bane Du’at bizin rejette tout l’obéissance et l’esclavage envers bane fausses dieux ki sorti de l’imagination et du désire de l’homme. Le Quran Shareef dire : « Nous fine déjà envoye parmi sak nation ene messager (pou dire zot) : ‘Adore Allah et évite Satan...’ » (16: 37) Nous réfère nous spécifiquement à bane messagers d’Allah avant l’époque de la venue de Hazrat Muhammad (saws). Le Quran Shareef dire nous ki le Daw’ah par example, pareil couma pou Hazrat Nuh (as) pas ti autre ki accepter Allah comme ene l’autorité finale. Hazrat Nuh (as) ti dire : « L’ordre ki mo fine gagner, c’est soumette à Allah (l’Islam). » (10: 73) Pareillement, le Quran Shareef cause lors le message de Hazrat Ibrahim et Ismail (as) comme étant ki zot fine seulement prêche le Tawheed et l’Islam. « Ibrahim (Abraham) ti ni ene Juif, ni ene Chrétien ; mais li ti sincère, li ti soumette à Allah seulement, et li pas ti donne aucaine associé à Allah. » (3: 68) Le Quran Shareef aussi rapporte bane du’a ki zot fine fer kot zot croyance ti bazé seulement lors le Tawheed ; (Hazrat Ibrahim et Ismail ti dire) « O nous Maître, fer nous soumette à Toi (vine bane musulmans) et zot nous bane descendants ene nation ki soumette à Toi (ki musulmans). » (2: 129) Pareillement, Hazrat Musa (as) fine demande à so peuple pou zot soumette à Allah seulement (pou vine bane musulmans). Hazrat Musa (as) ti dire : « O mo peuple, si ou accepter Allah, mette tout confiance en Li, si vraiment ou fine soumette. » (10: 85) En d’autres mots, la mission du Saint Prophète (saws) comme ene Da’iyyah li clairement défini dans sa affirmation Quranique là comme ene communication du message (Da’wah). Deuxièmement, pou éduque et instruire tous dimounes et donne zot la sagesse et troisièmement, pou purifier et laisse Iman, Akhlaaq, et Mu’amalat (ki veut dire la foi, la manière couma pou accompli ene travail et faire bane dealing) développer et grandi lors ene base éthique et morale. Da’wah, à la lumière du Quran Shareef li essentiellement ene procès éducationelle kot tous le temps ou reste enrichir ou connaissance, ou augmente ou piété et savoir-vivre et bane bon manières aussi. Le Training Spirituel d’ene Travailleur de Da’wah (Dai’Illallah) Bane meilleurs modèles en forme humaine de tous bane enseignements et commandements d’Allah, et ki fine copié l’exemple du Saint Prophète Hazrat Muhammad (saws) ti bane Sahaba et bane générations pieux ki fine vine après zot. Sa bane dimounes là zot ene l’exemple pour nous parski zot fine passe zot la vie en entier pou propage le message du Deen, le message de l’Islam. Ene Dai’yyah (ki travail pour le Da’wah) ki appelle l’humanité vers la Vérité, en réalité, li pé appelle dimounes vers l’obéissance à Allah Le Tout Puissant parski la plus grande Réalité et Vérité de sa l’univers là c’est ki li (sa dimoune là) ena ene Créateur, le Maître et Le Dirigeant ki aussi, Li Celui ki Nourri nous, et ki Li tousel mériter ki nous adore Li et obéir Li. La relation ki exister entre le créature et le Créateur (Allah), si li basé lors la Vérité, c’est ki bane créatures bizin adore le Créateur et obéir tous So bane commandements. Sa fait là fine mette au clair par le Créateur de l’univers Li-même (kot Li dire) : « Nous fine créer bane Jinns et Dimounes pou ki zot adore et obéir Moi. » Donc dans tous bane activités de la vie humaine, le plus important c’est ki l’homme obliger obéir So Créateur et li bizin obéir Li totalement. Pli grand travail pou ene dimoune dans so la vie lors sa la terre là c’est pou invite les autres dimounes entier lémonde, kot li été, pou prosterne devant So Créateur et pou adore Li tout sel, car c’est Allah ki so vrai Maître. Le groupe ki le plus distincte, le plus respectable, le plus honorable et le saint, le pieux ki fine vine dans sa le monde là pou invite l’humanité vers l’adoration de zot Créateur et zot Seigneur c’est le groupe de bane prophètes, de bane messagers d’Allah ou bane revivificateurs de la foi. Bane membres de sa groupe là, sakaine dans so l’époque et ki sorti de parmi so propre peuple même, fine donne le même message à tous bane dimounes ; en d’autre mots, couma le Quran Shareef rapporté : « O dimounes ! Adore Allah. Ou pas ena aucaine dieu aparte Li. » Donc, le groupe de bane dimounes ki nous capave pli compte lors zot, nous capave mette nous confiance dans zot et ki zot pieux, c’est bane prophètes. Zot concentrer zot seulement dans invite l’humanité vers l’adoration d’ene sel Dieu parski sa réalité là, sa même pli grand vérité de l’univers. La vérité ki zot fine enseigner c’est ki l’homme fine créer par Allah et li (l’homme) li le serviteur d’Allah. L’humanité bzin accepter sa grande vérité là et kan zot accepter sa, c’est sa même meilleure acceptation de la réalité. Le message de bane prophètes fine être propager par zot bane compagnons sincères et par bane dimounes « Muttaqi », pieux, ki fine suive sa bane prophète là, sakaine dans zot l’époque. C’est pourquoi ki nous capave dire ki en présence d’Allah, l’invitation à l’humanité vers la guidance et le bien-être et le droit chemin capave seulement réussi à travers l’obéissance d’Allah. Sa même pli grand travail ki ene dimoune capave faire dans so la vie. Bane inventions scientifiques, bane l’avancement technologiques, bane progrès dans comforts de l’homme, aide bane pauvres et bane ki dans le besoin, bane l’organisations educationelle et de bien-être, la charité, la sauvegarde de la paix et tous bane les autres travails de bienfaisance, tous sa là pena aucaine raison d’être comparer avec sa pli grand travail là (le Da’wah), et tous sa là vine en deuxième position. Dans lizié d’Allah, travail ki pli noble, ki pli exalté et pli haute dans sa le monde là et dans l’au-delà, et ki pour le bénéfice et le progrès de l’humanité, c’est pou appelle tous bane les autres frères, sœurs et zenfants, bane créatures d’Allah, vers l’obéissance et l’adoration de zot Créateur. C’est pourquoi ki li très nécessaire ki dimounes ki ena sa don pou causer là (‘power of tongue’ là), sa don pou exprime li là, sa capacité de connaissance là, zot bizin rentre pleinement dans sa travail noble là, et même ki zot occuper, busy couma busy dans zot travails mondaines, zot bizin mette zot confiance dans Allah seulement et ki zot trouve ene le temps pou ki zot accompli zot part de Da’wah. Toutefois, oui, bizin ena ene certain abilité et capacité pou faire sak travail, et pou faire le travail de Deen-e-Islam, c’est-à-dire, prend le message d’Allah pou propage sa partout dans le monde à tous So bane créatures. Et aujourd’hui avec bane nouvo technologie couma ordinateur, zot capave servi sa l’instrument là en allant lors le website pou gagne la connaissance de la droiture et non pas le contraire. Donc, pou faire le Da’wah, ene kikaine bizin ena sa capacité là et ene bon training parski li bizin conné couma pou aborde le sujet et li bizin expecte aussi ki li pou gagne bane questions embarassants. Li bizin conné couma pou donne bane réponses à la lumière du Quran Shareef et bane Hadiths authentiques. Allah, le Tout Puissant, Li-même Li bizin entraine So bane messagers à travers bane méthodes particulier, hors de l’ordinaire. Parfois Allah manifester So bane messages, So bane signes dans zot-mêmes et dans l’univers. A l’époque de Hazrat Musa (as), ti ena sa l’entrainement là même dans la caze de Pharaon kot Hazrat Musa (as) ti grandi là-dans, et ene l’autre fois kan li fine vine ene berger ; parfois ena So serviteur choisi ti dans puits et dans prison et kot finalement li vine ene grand dimoune couma le roi lors ene trône, parfois encore dans ene la cave et kot li bizin sauver depi so l’endroit, ou sois nous capave appelle sa Hijra, kot finalement la domination du système islamique pou régner. Après bane messagers d’Allah, celui ki ena pou faire le travail de la propagation de la vérité bizin possède bane abilités spéciales en exerçant bane training spécial. (Ena ti dire pou donne cours 2 semaines pou entraîne bane Waqfé Naw lors Tabligh/Da’wah). Sa l’entrainement là bizin ena ene bonne connaissance bien approfondi et ene pratique, sans quoi le travail de l’Islam pas pou capave fer dans ene meilleur façon, ni pou capave arrive à so meilleure conclusion/résultat. Bane Programmes Modèle de Da’wah Islamique Nous bizin fer tous nous z’éfforts pou ki nous pas laisse bane programmes de Da’wah gagne bane mauvais critiques et bane contreverse et faudé pas laisse sa bane programmes là engager dans politique active. Sa bane programmes de Da’wah là bizin tous les temps supérieurs ki saki mo fine mentionner là. Premierment, nous bizin ena le potentiel, la connaissance, la force et dévotion pou rendre service à Da’wah. Nous dévotion à l’Islam, nous l’amour pou Allah (swt), nous ponctualité, nous l’honnêteté, nous capacité pou invite la confiance, tous sa là zot, zot propre caractéristiques en zot-mêmes. Nous bizin approche la masse afin pou mobilise et propage la parole d’Allah. Nous bizin organise bane conférence publiques, bane classes et bane séminaires. Nous bizin offert bane études Islamiques et bane classes Arabes (langues Arabes) et organise bane programmes d’entrainement. Sa bane programmes là pou répanne le message de l’Islam, pou prépare ene Musulman pou vine ene Musulman, et pou réconcilier ene non-Musulman comme ene premier l’étape pou conquérir so lékaire (ki li missié ou madame) à l’Islam. A travers bane programmes de Da’wah, bane dimounes pou invité pou joine là-dans et participé. Bien-sûr, pas tous dimounes ki participé pou vine bane chefs potentiels dans le future. Bane dimounes énergétique, intelligent et talentueux ki ena bane qualités de chef zot toujours en ti nombre. Bizin développe bane programmes de Da’wah et sa bizin être ajusté à bane facilité existant. Bane programmes tous les semaines, deux fois par semaines, ene fois par mois, tous les quatre mois, deux fois par an, et ene fois par an, bizin plannifié pour tous régions et pour bane dimounes de tous professions. Bizin fer sa bane programmes là zot publicité, et circuler partout et bien-sûr, zot bizin bien plannifé pou attire bane dimounes. Bane nouvo programmes de Da’wah bizin donne l’impression ki li fine être créer pou éduque bane dimounes. Pli ena la connaissance, pli ena la lumière. Pli ena la lumière, pli ena l’unité. Pli ena l’unité, pli pou ena la force, et pli ena la force, pli ena pouvoir, kot sa pou amène vers la pure gloire de l’Islam, l’Islam dans so pureté. Bizin dédié sa bane programmes là à l’enseignement et l’entrainement et sa pou ouvert pou tous dimounes. Sa bane programmes là pou supplémente bane zéfforts ki fine fer par bane les autres organisations islamiques. L’intention derrière sa bane tels zéfforts là c’est pas pou renverse le gouvernement, mais pluto pou éduque tous dimounes, même le gouvernement, et fer bane dimounes conscient de zot engagement islamique. Le but et l’objectif de sa bane programmes là c’est le Da’wah. Li pas alle à l’encontre de bane programmes de Da’wah ki certains de bane organisition musulmanes fer. Kan nous focalize lors bane problèmes politique et économique du monde musulman et nous fer dimounes prend ene conscience intéllectuel, li différent dans prend part dans ene élection. Pou participe dans élections veut dire invite bane l’oppositions (lors nous). Sa pou éventuellement amène vers création de bane obstacles dans nous bane travails de Da’wah. Kan mo pé dire sa, sa pas veut dire ki l’action politique et participation dans la politique active li pas dans plan de bane travailleurs de Da’wah (Da’ee). L’intention derrière sa c’est pou éduque bane dimounes et attane ziska nous capave sécurise le succès. Le problème de bane musulmans c’est ki ena ene tas causer à propos l’Islam, mais kan il s’agit pou mette sa en pratique, ena toutes sortes de bane excuses (pou pas fer travail là). Zot cause à propos d’ene état islamique comme ene état de bien-être, mais zot pas fer assez z’éfforts pou organize bane projets ki pou amène sa bien-être là, pou amène sa aide sociale là. Beaucoup de bane musulmans zot trop émotionné dans zot l’approche de l’Islam. Zot crier plisse ki zot penser et plannifié. C’est sa causer émotionelle là ki créer ene mé-entente ki l’Islam encourage bane activités de sabotage, le terrorisme et fanatisme. Bane kitchoses pas capave changer par la force seulement. Bizin ene bon méthologie de l’éducation et d’entrainement pou promouvoir le changement. Beaucoup de bane musulmans penser ki si remplace bane dirigeants musulmans actuelle par bane séki vraiment « Islamique », alors la situation dans le monde musulman pou changer. Sa solution là li logique et li offert ene l’espoir mais li pas facile pou accomplir sa. Même si ene grand personnalité Islamique prend pouvoir dans ene pays musulman, li capave fer très peu de choses, et so mandat capave fini lors ene note lamentable. Le présent système dans beaucoup de bane pays musulmans tire so l’autorité d’ene philosophie et l’éducation de bane derniers 200 ans. Bane nouvo l’écoles et collèges (l’université) ti ouvert dans bane regions occupé et bane musulmans ti recevoir zot l’éducation là-bas. Bane étudiants musulman ki ti ena bane vrai talents, bane vrais potentiels, zot, zot ti pé alle gagne zot training dans bane colleges et l’université de l’Ouest. Sa bane là (l’Ouest) ti encourage zot pou vini vers zot, et fine même donne zot bane la bourse. Après ki fine prépare ene génération de bane musulmans dans sa nouvo philosophie là, alors kan ti arrive l’heure pou ki zot prend le gouvernement, et alors zot fine construire bane l’institutions kan zot fine prend pouvoir. Alors bizin ene travail de Da’wah bien plannifié dans tous secteurs mais bizin concentrer plisse dans l’Islamization de l’éducation (c’est-à-dire, faire l’éducation déroule d’après le plan islamique). Bane organizations de Da’wah bizin ouvert bane institutions islamiques de hautes qualités. Bane chefs politiques musulmans, bane travailleurs du gouvernement et beaucoup de bane intéllectuel zot oppose zot à ancien tradition de fer l’éducation. Zot trouve sa comme ene signe ki bane musulmans au lieu pé avancer, pé pli recule en arrière. Le nouvo concepte de l’éducation islamique à travers l’Islamization de l’éducation moderne ou l’ouverture de bane nouvo institutions islamique éducationelle li pour la bienvenue à condition ki so bane gradués pense dans ene façon islamique et ki zot créatif dans la science et la technologie. Azordi, bane musulmans autour du monde zot impréssioner par le developpement de l’Ouest, et zot bane livres (de l’Ouest) ki zot enseigner dans tous bane collèges et l’université Musulmans. C’est bane sciences sociale occidentale ki pé pli mette en péril nous société. Bane organisations Da’wah bizin: 1. Fer zot mieux pou vine actif dans procès de developpement du curriculum. 2. Ena bane nouvo informations à propos bane décisions ki le gouvernement fine prend lors l’éducation. 3. Ena ene céllule de recherche ki opérer par bane professeurs compétent pou développe le curriculum Islamique. 4. En contacte avec bane l’écoles privé pou implimente zot bane curriculum ki zot pou proposé. 5. Développe ene curriculum Islamique avec bane livres de classes Islamiques pou remplace l’Ouest so bane curriculum et so bane livres d’étude. 6. Ouvert bane l’écoles et institutions Islamique modèle pou remplace le systèm de bane l’école de l’Ouest et pou remplace bane système Madrassa ki ancien. Li bien important ki fer encore plisse zeffort en groupe et pou dépecher pou fer sa travail sacré là. L’établissement d’ene Da’wah Academy c’est pou promouvoir la recherche lors Da’wah Islamique, l’entrainement de bane travailleurs Islamique, et pour l’organisations de bane programmes de Da’wah, ki li dans le pays même et au niveau international ; pou organise bane séminaires et bane ateliers de travails ; pou publier bane matériaux lors le Da’wah Islamique dans bane différents langues. Bane l’objectifs c’est pou entraine bane future leaders de bane musulmans pou gagne ene vision pli grand et pli clair de l’Islam et de travail Da’wah ; pou conne les uns les autres ; pou vine au courant de bane travails de Da’wah autour du monde ; pou bénéficier de bane l’expérience de bane les autres, et pou finalement gagne ene meilleur co-ordination dans le future. Pou comprend bane les autres religions et pou adapter ene meilleur l’approach vers zot, le Da’wah Academy bizin entretenir bane différents projets lors l’étude de bane les autres religions. Bane livres et bane l’articles bizin publier lors l’Islam et bane les autres religions. Tous bane programmes de training bizin ena bane sessions spéciale lors l’Islam et bane les autres religions. Travail Da’wah pas capave vine ene succès à moin bane travailleurs de Da’wah (bane Dai-Illallah) conne à propos bane les autres religions et zot au courant de zot bane systèmes de croyance et zot bane les autres pratiques religieux. Section de bane Zenfants Musulmans Bane zenfants musulmans zot bane future de l’islam. Le Da’wah Academy bizin organize bane programs pou bane zenfants et publier bane livres et zistoires islamiques pou bane zenfants dans bane différents langues. Bane zenfants bizin être encourager pou écrire, et bizin fer bane provisions pou donne zot bane cado, pou récompense bane meilleurs écrivains parmi zot. Section Publication Le Da’wah Academy bizin engage li à partir de maintenant même dans bane traductions de tous bane textes ki fine révéler (par révélation). Sa bizin traduire et publier en Arabe, Anglais, Ourdu, Espagnol, Allemand, Japonais, Chinois, Français, Sindhi, Pashto, Punjabi, Baluchi, Creole, Swahili, Moiraise, Malagasie et bane les autres langues, dans bane livres populaire et distribuer partout dans le monde. Insha-Allah. Ene Centre d’Étude de Da’wah bizin ouvert à tous bane étudiants dans bane pays Musulmans et bane les autres pays. Pour bane étudiants Musulmans ki vine de bane pays kot ena bane Musulmans en minorité, et ki envie apprane l’Islam, alors le Da’wah Academy bizin ena ene cours spéciale de Un an avec so certificat et aussi ene cours de diplôme de 2 ans dans le Centre d’Étude de Dawah. Section Documentation de Da’wah So but c’est pou collectionne bane information concernant bane activités de Da’wah dans bane communautés musulmanes kot bane Musulmans fine établir zot, bane littérature Islamique dans bane langues différents, bane matériux audio-visuel lors bane topics islamiques et bane magazines lors Da’wah. L’objectif li pas seulement pou ena ene librairie modèle, mais pou établir ene réseaux co-ordinné entre le Da’wah Academy et bane les autres organisations musulmans ki orienté dans Da’wah. Avant mo terminer lors sa sujet là, mo mentionne deux points : (1) Bane étudiants Musulmans bizin fer ene l’approche rationelle à bane sciences sociales et accomode bane l’idées contraire, mais lors bane sujets de la religion, parski beaucoup d’entre zot vine émotionelle et intolérant. Bane débats lors bane sujets religieux pou alors rétablir rationalité. (2) Bane missionaries Chrétiens fine gagne beaucoup succès dans zot bane missions à cause zot pas fine confronte directement bane gouvernements de bane pays kot zot fine établir. Au contraire zot fine ena ene bon lien de travail, de collaboration avec zot, ki zot ene gouvernement Chrétien ou non-Chrétien, et alors zot fine fer sa pou arrive à zot l’objectif. Kan ene dimoune li-même pas conne le critère de la vérité, et couma la vérité capave être reconnu et identifié, et ki so bane l’aspé et limites, et ki li empêche nous pou gagner, et ki li commande nous pou fer, alors couma eski li pou capave présente la vérité à bane les autres, et couma eski li capave conner ki li pé en fait présente la Vérité ? Li bien possible ki li capave présente fausseté sous ene l’impression ki li pé présente la Vérité. Alors, afin ki le message de l’Islam li répanne, ene Da’ee (ene precheur ki appelle dimoune vers l’Islam) bizin avant tout recherche la vérité et li bizin alors reconnaite sa vérité là, et li bizin au courant de sa vérité là et li bizin suive fermement et avec insistance sa vérité là. Ene dimoune ki réellement envie travail pou l’Islam pou définitivement entreprendre sa bane étapes là: (1) Li bizin développe la conscience et la sensibilité. (2) Li bizin ena ene bon motivation. (3) Li bizin acquérir la connaissance et la droiture. (4) Li bizin étudier la vie de bane Sahaba du Saint Prophète (saws). (5) Li bizin ena ene relation actif avec Allah – c’est-à-dire, li pas abandonne so bane Namaz, Zikr et bane les autres actes d’Ibaadat. (6) Li bizin ena l’amour pour le prophète (saws). (7) Li bizin pense lors la vie après la mort. (8) Li bizin moule li-même dans caractère d’ene vrai travailleur de Da’wah pareil couma Quran fine expliquer. Rappelle bien : 1. Allah pas guette ou l’apparence et ou bane richesses, mais Li guette ou les cœurs et actions. 2. N’importe ki sanlà ki dire ene dimoune pou deboute ou sois li-même li deboute pou raconte dimounes lors so bane propres vertu, Allah pou deboute pou montrer bane dimounes so bane faiblesses le Jour du Jugement. 3. Celui ki lire so bane Namaz pou montrer lizié dimounes, fine commette ene péché ; celui ki donne la charité pou montrer lizié dimoune fine commette péché aussi. 4. Ene dimoune li vine sage kan li contrôle so nafs (égo, so bane passions) et li travail pour gagne séki de bon dans la vie future, mais ene dimoune li faible, celui ki suive so propre désires et ensuite dire : « Allah Li Gracieux, Li Miséricordieux. » (C’est-à-dire, li fer bane kitchoses ki pas bon, et ensuite li croire ki zis kan li dire ki Allah Gracieux, et Miséricordieux, ki alors tout fine rentre dans l’ordre pou li.) 5. Allah pas accepter paroles d’ene dimoune sage, mais Li accepter so bane l’intentions et so bane motifs. 6. Ena dimounes pou paraite devant Allah avec zot bane bons actions ki égale à montagne de Tahama mais Allah pou souffler zot couma la poussière ; bane tel dimounes parmi zot, ki prier avec dévotion pendant la nuit, mais ki en privé zot fer bane tels péchés ki zot ti pou honté pou fer devant dimounes. Ki Allah béni ou tous avec Ilm (la connaissance) pou comprend So bane messages et ki zot mette sa en pratique afin ki comme ene lécorps uni et réformer, nous capave marche vers la construction d’ene nouvo société kot l’unicité d’Allah ena ene place ferme dans sak le cœur. Pour sa, li le devoir de sak membre Sahih al Islam, spécialement bane ki envie dévoué zot le temps dans le chemin d’Allah pou fer le Da’wah. Pour sa, Incha-Allah, nous bizin construire pas seulement nous Dawa Academy physiquement, mais même si pour le moment nous pas ena ene grand Dawa Academy, pareil couma ene l’université, mais nous bizin fer pareil couma nous bien-aimé Prophète Hazrat Muhammad (saws) ti fer kan li créer bane savants de so bane compagnons et de so bane madames (surtout Hazrat Aisha (ra)) et de ce fait fine établir ene l’université de l’Islam ki li dans Masjid et dans so bane la cazes aussi ; plisse ki sa encore, li fine fer li-même et so la vie vine ene lecturer et so la vie comme ene l’université pou ki sak dimoune copier de so l’exemple. Ki Allah guide nous tous pou suive So bane instructions dans façons ki Allah oulé et ki nous profite de bane de l’eau divine, du ciel ki pé tomber lors nous dans sa siècle là, pou ki nous implemente ene société Islamique parfait. Insha-Allah, Ameen.

Khutba Jummah (Écrit & Audio): 05 Octobre 2012

 Discours d’Ouverture du Jalsa Salana 2012

Discours lors l’Éducation

 

Jalsa Salana 2012 (Anglais)

Retourne à Page Principale

Écoute le Discours de Huzur (atba) lors Dawa  ~ Jalsa Salana 2012 (Audio)