Text Box:  DISCOURS JALSA SALANA 2012  Discours d’Ouverture Hazrat Khalifatullah Hazrat Munir A. Azim (atba) (Vendredi 05 Octobre 2012 ~ 18 Dhul-Qaddah 1433 Hijri) Après Salaam, Hazrat Khalifatullah (atba) fine lire le Tashahhud, Ta’uz, Surah Al-Fatiha, et ensuite fine dire: Ene société li constitué de plusieurs dimounes. C’est pourquoi l’Islam fine donne ene séries de directions pour la liberté, le progrès et la protection d’ene dimoune. L’homme fine gagne de côté d’Allah la liberté complète de conscience, et sa li évident par sa révélation ki Allah fine donne le Saint Prophète Hazrat Muhammad (saws) : “LA IKRAHA FIDDIN” Péna aucaine contrainte dans la religion (l’Islam). Sak membre ena ene l’esprit de so choix, c’est-à-dire, li décider pour li-même, et li libre pou fer so propre choix. L’homme fine recevoir ene libre-arbitre et li capave aussi servi so propre jugement. Li pas ene machine ki diriger par ene la force inconnu ou aveugle. Sa liberté de conscience là, sa liberté pou choisir et fer so propre destin là, sa c’est ene kitchose ki Allah fine accorde à sak dimoune comme so droit dès so naissance, et sa li considérer comme le plus grand cadeau ki Allah fine donne l’humanité. Pas ena aucaine les autres créatures aparte bane dimounes ki fine recevoir ene telle droit de côté d’Allah. “TOUT BANE DIMOUNES ZOT BANE FRÈRES” Péna discrimination Pour le progrès de l’homme, Allah fine ouvert pou li plusieurs chemins, plusieurs opportunités. Ena plusieurs chemins et moyens ki Li (Allah) fine mette à la disposition de l’homme afin ki li capave faire so début et so preuve dans la vie. Alors, pour sa Allah enlève tous bane barrière de so chemin. Islam reconnaite ki péna aucaine BARRAGE dans n’importe ki façon entre bane dimounes, ki li concerne couleur, naissance, rang, caste ou la foi d’ene dimoune. Tous bane dimounes zot égale dans lizié d’Allah et tous fine gagne de Allah ene opportunité, ene chance égale. Bane différences dans pigmentation et dans langage fine bien expliquer dans sa verset du Quran ki mo pou mentionné là : « Et parmi So bane signes c’est la création de bane les ciels et la terre, et diversité de zot langues et couleurs. Dans sa surement ena bane signes pou bane ki réfléchi (bane Ulul-al-Baab). » (30: 23) Dans même façon l’Islam explique bane façon et source de bane plusieurs clans, tribus et races : « O bane dimounes, Nous fine créer zot d’ene male (missié) et d’ene femelle (madame); et Nous fine fer zot en bane tribus et sous-tribus afin ki zot capave reconnaite zot camarades. En vérité, le plus honorable parmi zot dans lizié d’Allah c’est celui ki plus droite (et ena la crainte d’Allah) parmi zot. Surement, Allah Li conne tout, Li au courant de tout zaffaire. » (49: 14) Faudé pas ki zis sa simple fait ki nous appartenir à ene peuple particulier là qualifier nous pou ene rang pli honorable dans la société, mais c’est seulement nous bane bons actions ki pou capave fer nous arrive à sa grade d’honneur là. Concernant la protection de la vie, de bane dibiens et l’honneur d’ene dimoune, le Saint Prophète de l’Islam (saws) fine mette sa clair dans ene parole ki li fine dire pendant so discours d’adieu pendant so (premier et) dernier Hajj. Li (saws) dire : « En vérité, zot disang, zot richesses et l’honneur tous sa là sacré pour zot, pareil couma sa Jour, sa Mois et sa la Ville là sacré. » Pendant le mois de Hajj, li interdit pou touye n’importe quoi – même la vie d’ene lipou bizin respecté ! Ena bane principes lors quoi bane super-structure de l’homme zot reposé. Sak membre de la société bizin ressenti ene sense de sécurité et de paix interne. Sakaine bizin ena ene zèle et l’ardeur bien fort pou travail courageusement et avec fermeté pour le progrès et développement de la nation et de nous pays (sakaine so pays). Sak dimoune so lékaire bizin ena dans li ene l’amour patriotique ki fer li sacrifier so la vie pou so patrie. C’est sa vrai l’esprit derrière bane progrès rapide de certains nations. Allah Li-même content avec manifestation d’ene telle l’esprit. LA FAMILLE – UNITÉ DE BASE DE LA SOCIÉTÉ Ene l’autre unité et infrastructure de la société de l’homme : c’est la famille. Pou constituer ene famille, le plus important partie c’est relation entre ene missié et ene madame. Pareil couma l’Islam fine mette certain règlements pour l’honneur et responsabilité de l’homme, l’Islam fine place la femme aussi lors même pié-d’estrale pareil couma ene z’homme. Quran Shareef dire : « Zot ene vêtement pou ou, et ou ene vêtement pou zot. » (2: 188) En plusse de sa, le Quran fine place tous les deux, ki li missié et madame lors même statut d’égalité en séki concerne zot bane droits, kot li (Quran) déclarer : « O ou ki ena la foi ! Li pas légale ki ou hérite d’ene femme contre so volonté ; ni zot bizin emprisonne zot (c’est-à-dire, pas laisse zot aller) avec ene mauvais l’esprit pou ki zot capave prend ene part de saki ou fine donne zot, excepté si arriver zot coupable d’ene mal ki bien clair ; et gagne relation avec zot en toute gentillesse, et si ou pas content zot, c’est peut-être ki ou détester ene kitchose kot Allah fine place beaucoup de bien là-dans (pou ou). » (4: 20) En plisse de sa, ena ene l’autre verset Quran ki montrer la relation entre bane z’hommes et bane femmes : « Et ene parmi So bane signes c’est, ki Li fine créer bane épouses pou ou de parmi ou-mêmes afin ki ou trouve tranquillité d’esprit dans zot, et Li fine mette l’amour et tendresse entre zot. Dans sa surement ena bane signes pour bane dimounes ki réfléchi. » (30: 22) Le seul moyen pou créer ene relation entre l’homme et la femme c’est le mariage... Dans le monde d’aujourd’hui le choix d’ene partenaire li fer lors sa bane bazes là : la beauté, richesse et position sociale. Sa c’est la raison kifer ena bane difficulté ki vini et ki multiplier dans la vie sociale. Nous bien-aimé prophète (saws) fine dire : « Premier zaffaire ki bizin considérer kan ou pé recherche ene compagnon (pou marier) c’est la vertu et statut morale. » La beauté et position sociale zot bane kitchoses temporaires. Sel kitchose ki durable et permanent c’est la vertu ki ene l’avantage dans ene partenaire et ki aide pou combatte tous bane difficultés ki capave gagne dans ene vie de couple. Après le mariage, meilleur façon pou entretenir ene bon relation parmi bane familles fine resumé par Nabi-Kareem Hazrat Muhammad (saws) dans sa façon là : « Le meilleur parmi zot c’est celui ki traite so madame bien, et mo le meilleur ki zot envers mo famille. » KIFER LE DIVORCE? En dépi de sa bane guidances et exhortations là, le choix d’ene dimoune capave pas 100% correcte pour ene raison ou d’une autre. Li capave ki ene couple marié pas jouir d’ene la vie de contentement à cause incompatibilité de tempérament, ou li capave ki, pareil couma nous dire dans l’époque de la science (moderne, kot la science fine perfectionner), à cause ki mari-femme pas lors même longueur d’onde. Dans bane telles circonstances l’Islam fine fer provision de divorce malgré ki le Saint Prophète (saws) fine dire : « De tous bane kitchoses ki fine permette, le divorce li sa kitchose ki pli détestable dans lizié d’Allah. » Peut-être c’est ce ki explique kifer beaucoup de bane maris et femmes musulmans zot vivre séparé des années et des années et zot pas fer démarche pour alle vers divorce parski zot fine appranne ki le divorce li kitchose ki pli abominable dans lizié d’Allah. D'autre part, nous trouver ki dans bane pays occidentaux zot alle dans la cour de divorce pour bane raisons bien insignifiantes. L'Islam ordonne ki, dans ene cas de difficultés entre ene mari et ene femme, les deux parties zot bizin désigne bane responsables de parmi zot propre famille pour agir en tant ki arbitre ki pou essaye pou amène ene réconciliation entre les deux. De ce fait, le Quran Shareef dire: « Et si zot craindre ene désaccord entre zot (mari et femme), alors désigne ene arbitre de so famille. Si zot souhaite réconciliation, Allah pou rétablir l’accorité entre zot. En vérité, Allah Li conne tout et au courant de tout. » (4: 36). Toutefois, si la médiation li pas réussi et ki la réconciliation li impossible, alors zot alle vers ene divorce, pareil couma ene l’opération li vine nécessaire, kan bane les autres recours vine inefficace. Dans le cas de divorce, sa aussi l'Islam demande à ene mari pou traite équitablement avec so femme en ce ki concerne so situation financier. La femme pas ena le droit pou remarier avant ki so trois règles fine terminer. Si li enceinte, alors mari là bizin subvenir à so bane besoins ziska ki li accoucher. Mari là bizin entretenir financièrement so madame et aussi tous bane charges financières vine lors so z’épaules, malgré ki femme là capave ene membre de la famille ki travail et gagne ene la paye et kot li capave gagne la paye plisse ki so mari. Alors là aussi mari là bizin occupe so madame. NON À L'ADULTERE MAIS OUI À LA POLYGAMIE, MAIS... Mo convaincu ki l'enseignement islamique concernant le mariage et le divorce capave aider pou résoudre bane nombreux problèmes sociales et pou éfface tous bane mals ki bane dimounes fine hériter. Beaucoup de bane mariages zot ratés à cause ki bane z’hommes et bane femmes zot pas ena ene contrôle ki bizin lors zot bane passion charnelle et de ce fait zot pencher vers l'adultère et la fornication. Sa fléau social là fine prend bane proportions énormes et li fine vine ene cancer de la société. La prostitution fine vine ene sorte de commerce et li fine légalisé dans plusieurs pays, et li lors le point pou être légalisé dans bane les autres pays d’après certains journals. De ce fait, li ene très grand mal social, ene mal condamné par tout bane religions, et ki fine gagne ene statut social et reconnaissance officielle par bane la lois de bane pays du monde. D’après l'Islam, l'adultère li l'ennemi numéro un de la société et li ene péché ki puni par la loi. Toutefois, dans certaines circonstances, ene mari li obligé rechercher la compagnie d'ene l’autre madame, par exemple, si ene femme li contaminée par la lèpre, li souffert d’ene maladie ki pas capave guéri, ou bien li stérile et pas capave mette au monde bane z’enfants pour satisfaire le désir paternel de so mari. De la même manière, capave arrive ene cas (pareil couma nous pé trouver azordi jour) ki ena plisse madames dans ene pays, et même dans le monde, plisse ki bane missié. Sa tendance là fine arriver à cause bane la guerre, surtout depuis deuxième la guerre mondiale. Dans sa bane circonstances là, eski li souhaitable ki bane z’hommes et bane femmes vivre ene la vie libre et malpropre, et ki zot commette l'adultère et donne naissance à bane nombreux zenfants non désirés ki pou vine ene fardeau pour la société et pou gouvernement? Pas du tout. Pour réponde à sa situation d'urgence là, l'Islam fine donne permission à ene z’homme pou marier plisse ki ene madame kan le besoin li ressenti, mais pour ene croyant normale, pareil couma Quran fine établir, faudé pas li dépasse quatre madames... Le monde ki ti anti-Islamique lors la question du divorce fine bizin copie lors l’Islam lors so la loi de divorce. Le monde même li pour le moment contre la polygamie mais li pas conner ki c’est à travers la polygamie ki plusieurs mal de la société couma l’adultère et la fornication capave arrêter. Nous fer duah ki la loi mondiale de tout pays zot trouve l’utilité pou applique sa la loi là et fer li vine dans même norme ki l’Islam prêcher, parski sa li meilleur ki l’adultère. L'EDUCATION DE BANE ENFANTS Maintenant, mo oulé dire quelques mots lors bane enseignements Islamiques ki rélié à l'éducation et grandissement ki correcte de bane enfants. L'Islam fine bien mette l’emphase lors sa point là. De nombreux mals sociales capave être éliminés par la façon ki nous élève nous bane z’enfants et bane générations futures capave être sauvé de beaucoup de difficultés si bane z’enfants zot éduqués de façon approprié et fine suivre certaines lignes de conduite. A cause ki nous appartenir à plusieurs religions et plusieurs races, nous bane z’enfants grandi avec certains préjugés ki capave éliminé par ene l’éducation appropriée dès zot ti l’enfance même. Laisse-nous enseigne à nous bane z’enfants pou ena l’amour pour so prochain sans distinction de caste, de couleur ou de religion. Nous bizin dire zot ki c’est ene même disang ki coule dans nous la veines et bane naissances dans bane différents foyers pas rende zot pli différents ki les autres. Tous bane z’enfants zot égales et par conséquent, zot bizin ena ene l’amour les un envers les autres. Le fait d'appartenir à telle ou telle religion pas fer ene pli supérieur ki so camarade, et l’autre là inferieur, non ! Zot tous zot bane « zenfants » de Dieu, et faudé pas ki ena kit mauvais sentiments entre zot. PARTENAIRE POU MARIAGE – LA VIE FAMILIALE Bane premiers orientations ki la religion de l’Islam offert nous c’est ki ene mari et ene femme bizin marier lors base de la vertu et de bon moralité. Tous les psychologues zot d’accord lors le fait ki la moralité de bane parents laisse ene l’impression respectueux lors bane z’enfants nés de zot l’union. Ene l’autre orientation c’est ki, au moment de relation sexuelle entre ene papa et maman, zot bizin fer sa duah là : « O nous Seigneur (Allah), éloigne-nous de Satan et garde Satan loin de nous. » C’est au moment de la plantation de bane semences, ki li nécessaire pou invoque bane bénédictions d’Allah, afin que le fruit capave vine bon et sain. Puis, quand z’enfant là li né, bizin lire Azaan et Iqamat (appels à la prière) dans oreilles de sa bébé là. Ainsi, lors la bande claire et vierge de so l’esprit sa bane quelques bonnes paroles là zot enregistré. Nous ena aussi l’exemples de Hazrat Ibrahim et Hazrat Zakariyya qui fine fer bane duahs spéciales, à plusieurs reprises au nom de zot enfants ; Comme si l’Islam fine établi bane responsabilités de bane parents ki zot bizin commence prier pour zot bane z’enfants avant même zot naissance afin ki bane z’ enfants là kan zot nés, zot capave vine bane bons citoyens ki respectable et ki capave faire face à bane difficultés de la vie et lutte contre bane mals de la société de zot l’époque. Le Quran Shareef dire encore: « Pas touye zot z’enfants par peur de la pauvreté. » C’est-à-dire, bane parents faudé pas tictiké, mais au contraire zot bizin fer toutes sortes kalités sacrifices afin pou élever zot enfants correctement et pou donne zot ene bon l’éducation. Zot bizin également veiller à séki, en dehors d’ene grandissement correcte, bane z’enfants reçevoir bane meilleure soins, en ce ki concerne zot la santé physique. Hazrat Muhammad (saws) fine même demande à bane parents pou gagne ene contrôle lors zot-mêmes et pou pas présser pou gagne ene l’autre zenfant rapidement, après ki zot fine fek gagne ene zenfant. Mari là bizin conne à peu près le moment kot so madame pas ovuler pou capave gagne relation conjugale avec li, couma sa agir comme ene précaution jusqu’à ki zot zenfant fini sevré avec so maman et kot alors zot capave concentrer pou fer ene l’autre z’enfants avec la permission d’Allah. La vie de famille bizin être planifiée de telle sorte que ene mari et ene femme profite de sa la vie là et que le mal pas propager dans le monde entier pareil couma c’est le cas aujourd’hui avec bane comprimés (pou pas gagne zenfants). L’Islam pas permette planification familiale sous prétexte de sous-alimentation ou manque de nourriture. Production alimentaire augmenter sak jour. D’après le Quran Shareef ene la grain capave produire 700 et plisse encore. Ene principe exemplaire dans bon grandissement de bane zenfants fine établir par le Saint Prophète de l’Islam (saws): « Honore et gagne confiance dans bane zenfants et cultive l’esprit de CONFIANCE dans zot. » DIRECTIVES POUR ENE MEILLEURE SOCIÉTÉ Maintenant, permette-moi pou précise certains directives proposées par l’Islam pour débarrasse nous de certains mals de la société et pou construire ene société meilleure et plus progressive: 1. Bizin ena ene bon relation entre bane ki la haut et bane ki en bas, bane dimounes âgées et bane jeunes... 2. Mendianné li méprisé avec ene mécontentement extrême. Le Saint Prophète (saws) fine dire: «La main de celui ki donner li meilleur ki la main ki recevoir. » Fine ena ene période dans l’histoire kot bane dimounes ti ena bane charité pou donner, mais pas fine trouve dimounes pou prend sa charité là. 3. En ce ki concerne nous bane voisins, bane ki dans le besoin et bane orphelins, le Quran Shareef fine établi sa l’ordre là: « Et adore Allah et pas associer nannié avec li et faire preuve de bonté envers bane parents, et proche parents, et bane orphelins et bane ki dans le besoin, et voisin ki aussi ene parent (pou ou) et voisin qui ene étranger, et compagnon à zot côtés, et ene voyageur, et bane ki zot la main droites posséder. En vérité, Allah pas content bane orgueilleux et arrogants. » (4: 37). 4. Bien ki l’Islam fine rende l’Etat (surtout l’État Musulmane) responsable pour réponde à bane besoins essentiels de l’humanité couma la nourriture, l’habillement et logement, mais li fine dire ki séki meilleur, c’est ki l’homme gagner par la sueur de so front (c’est-à-dire, avec so propre zéffort). 5. Plusieurs conflits fine ena parceki ene chef de famille jette bane saletés dans la rue ou devant la maison d’ene voisin. L’Islam fine donne bane directives claires à sa sujet là et li fine même allé jusqu’à dire que c’est ene bon action pour enleve bane mauvais kitchoses ki pou blesse les autres de la route. De la même façon l’Islam pas permet pou rentre dans ene la caze sans permission propriétaire là. Kan ene dimoune fine retourne dans so la caze, li bizin informe bane dimounes ki dans la caze et fer zot Salaam. 6. De la même manière, afin pou promouvoir l’amour et l’amitié, Islam fine recommande l’échange de bane cadeaux entre voisins et camarades. Pli joli cadeau c’est pou dire kikaine : « Assalamou alaikoum », c’est-à-dire, Ki la paix avec ou. 7. Bien de bane mals sociales de nous (bane) pays pou capave enlever kan nous pou vivre ene la vie simple. Nous nourriture, nous vêtements, nous mode de vie bizin basé lors la simplicité et la modération. Le plus simple nous été, le plus nous pou fer bane camarades... 8. Pour évite ene clash entre capital et travail, tribunal industriel bizin suivre sa règle en or ki Hazrat Muhammad (saws) fine dire: « Ene travailleur bizin gagne so salaire – ene salaire adéquat – avant ki la sueur de so le corps sec. » 9. Pour termine sa série de guidances là, mo cite ene verset Quran, dans Surah Al-Maida: « Aidez les un les autre dans la droiture et la piété, mais pas aide zot camarade dans le péché et la transgression. » (5: 3) Mo message c’est ki nous bizin travaille en étroite collaboration les un les autres vers l’amélioration de la société et de la nation. Faudé pas nous blesse qui que ce soit par nous la mains ou nous la langues. Si nous partage bane la joies et bane la peines de bane les autres, pas ena aucaine raison kifer nous pas bizin vivre en paix et l’harmonie dans sa le monde là. En vérité, alors Allah pou béni nous et aide nous. (Ameen)

Khutba Jummah (Écrit & Audio): 05 Octobre 2012

 Discours lors l’Éducation: 06 Octobre 2012

Discours de Cloture: 07 Octobre 2012

 

Retourne à Page Principale

Écoute le Discours d’Ouverture du Jalsa Salana 2012 (Audio)